地盤佬飯盒驚見一物秒速被炒？管工巡查斷正怒喝：執嘢走！網民：抵死

地盤開餐時間吞雲吐霧斷正 管工正氣喝令：執嘢走！

從網上熱傳嘅影片可見，事發時一名紮鐵工人正喺地盤角落開餐，但手上竟然拎住支點着嘅香煙！一名巡查管工見狀，立即上前喝止，並義正辭嚴咁大喝：「拎個(工作)證嚟，食煙？攞個證嚟呀」。該名工人被當場「斷正」，嚇到一臉茫然，慌亂之間更將煙蒂直接放入自己嘅飯盒裡面. 管工見佢毫無悔意，怒火再度升級，命令佢「戴番頂帽」，再怒吼：「執埋啲嘢走」、「我會話畀你老細聽」，場面極具火藥味，睇嚟呢位工友份工都凍過水！

影片瘋傳網民一面倒力撐管工 怒轟犯規工人：抵死！

事件曝光後，影片隨即在各大群組洗版，大批網民並無同情犯規工人，反而一面倒力撐管工執法嚴明！唔少網民留言鬧爆：「師兄做得好，地盤火燭非同小可！」、「抵X死，上入職堂嗰時已經講明畀你聽唔食得煙啦」、「為咗啖煙無咗份工，真係蠢過隻豬」、「依家可以返屋企慢慢食煙啦」。網民認為，自從經歷過宏福苑世紀大火嘅血的教訓後，地盤全面禁煙係為咗所有工友嘅安全着想，絕不應該有人為一己私慾而犯規。

違規後果極嚴重隨時即炒兼罰$5000 網民：為啖煙冇咗份工！

事實上，喺地盤違規吸煙嘅後果絕對唔係講笑！有工會代表早前就表示過，現時地盤全面禁煙，一旦發現有工友違規，輕則面臨高達5,000港元嘅巨額罰款，重則更會被即時解僱，飯碗不保！雖然當局為方便工友，已喺地盤門外設立儲物櫃供存放香煙，但依然有人以身試法。今次呢位工友為咗短短幾分鐘嘅「享受」，隨時要付出失業同罰款嘅沉重代價，真係問你點收科！