亡母預繳飯錢食足2年｜女生8年後回去道謝揭殘酷真相

10歲女童餓到企喺檔口前吞口水被老闆叫停

女事主自小生於單親家庭，母親每日為生計奔波，她由外婆一手湊大。10歲嗰年母親因病離世，已退休的外婆為供她繼續讀書被迫重新出外打工，兩婆孫生活極度節儉，三餐不時只能靠即食麵充飢。某日放學後，女事主無如常返屋企，獨自喺學校附近美食街閒逛，被陣陣飯香吸引行到一間雜飯檔前，望住各式各樣餸菜忍不住吞口水，但摸吓袋得返2蚊。正當她失落想走之際，老闆突然叫停佢，聲稱等咗佢好耐，話佢母親生前留低咗一筆錢，以後嚟食飯直接從嗰筆錢扣除。女事主雖然半信疑，但餓到頂唔順，坐低食咗一頓飯仲打包一份畀外婆。自此之後，她每日放學都去雜飯店報到，嗰頓午餐成為佢一日之中最期待的一餐，足足食咗將近2年。期間佢多次問老闆筆錢夠唔夠，老闆每次都笑住話「還有很多，吃到你18歲都夠」。後來女事主生父突然出現，承諾供佢讀大學並將佢帶離家鄉，年紀尚小的她無力拒絕，只能聽從安排跟住離開。

事件曝光後大批網民睇到眼濕濕紛紛留言致敬

事件曝光後，大批網民被呢個故事感動到喊，紛紛留言向已故老闆致敬。有人話「一餐飯對老闆嚟講唔算乜嘢，但對嗰個細路女卻係溫飽肚子同心靈嘅一頓飯」，亦有網民大讚「老闆係天使，返咗天堂」、「世界因為呢啲無名英雄變得無咁難捱」。更有人留言鼓勵女事主「希望你有能力之後再幫助有困難嘅人，繼續將愛傳落去」，仲有網民話「如果呢件事發生喺我身上，我一定會問老闆娘墓碑喺邊，親自去拜祭同講出感謝嘅說話」。

相隔8年重回舊地老闆娘一句話揭開殘酷真相

8年後，18歲的女事主終於重回幼時居住地，發現雜飯店仲喺度，滿心歡喜想向老闆親口講聲多謝。但迎接佢的唔係老闆本人，而係老闆娘。老闆娘告訴佢，老闆喺佢搬走後1年已經離世，更揭開一個埋藏多年的秘密——「其實，根本冇乜嘢『媽咪留落嚟嘅錢』」。原來老闆當年聽到有客人講女事主母親過世，見到佢企喺檔口前望住餸菜嘅可憐模樣，實在唔忍心睇住細路女捱餓，先至編咗呢個善意謊言。女事主得知真相後崩潰，對未能親口向老闆講聲多謝感到極度遺憾，喺網上發文寫道：「謝謝你讓那個原本只能吃泡麵的小女孩，在那2年裏每天都能吃一頓熱騰騰的飯。希望你在那邊，一切都好。」