港女怒send 100封投訴信轟商場變焗爐 網民點名重災區唯獨一間被封良心

港女崩潰憶述昔日涼爽今變焗桑拿

事主在帖文中大呻，以前行入商場同港鐵，第一感覺係「爽呀好涼」，但今時今日完全係另一回事，人多擠迫加上冷氣毫不給力，混合汗水嘅氣味令人難以忍受。越想越嬲嘅佢，索性用AI草擬咗一份投訴信範本供全港人使用，信中狠批管理層將室內變成焗爐，導致到訪者汗流浹背，更搬出公共衛生理由，指高溫密閉空間極易滋生細菌，要求即刻將空調調至合理溫度。帖文一出，大批網民紛紛留言附和，場面墟冚。

網民群起點名各區重災商場鬧爆冷氣縮水

事件曝光後，大批網民替事主不值，紛紛點名各區「重災區」洗版。有人指青衣某商場係無冷氣嘅「表表者」，致電客服投訴竟獲回覆「佢哋有開，開25度」；沙田地標商場以前行街根本唔使自備風扇仔，而家卻熱得誇張；元朗、荃灣大型商場同樣被炮轟猶如焗爐，行一陣已經成身汗。旺角某旗艦商場過被形容「燈光又暗冷氣又唔夠，重要有陣噏味」。港鐵同樣中招，屯馬綫月台熱過街外，東鐵綫全車爆滿完全感受唔到冷氣，觀塘綫晚間「又焗又臭」，西鐵綫「焗到癲，風都無滴」，連香港國際機場都要擺座地風扇應急。網民一致認為係企業為慳成本兼配合環保政策，硬性將室溫定喺25度以上所致。

一間商場逆市突圍被封良心代表

不過在一片鬧爆聲中，尖沙咀The ONE竟然殺出重圍成為「清泉」。有網民公開激讚，話經過The ONE門口已經feel到勁凍勁正，即刻入去幫襯，封佢做有良心嘅商場。與此同時，亦有網民將冷氣問題同消費意欲直接掛勾，直言而家冇人行街唔係冇原因，喺屋企開冷氣食雪糕飲汽水先夠爽，暗示商場若繼續慳冷氣，只會趕走更多客人。