公屋廁所狂湧鄰居煙味求助反被嘲 樓主靠一神物逆轉

煙味從廁所抽氣扇湧入無法阻擋

事主在Facebook專頁「公屋討論區」發帖，表示鄰居長期在家中吸煙，二手煙味經由廁所抽氣扇源源不絕飄入屋內，令人苦不堪言。為免刺激煙民神經，事主特意聲明無意阻止他人在家吸煙，純粹想尋求解決良方。豈料帖文一出，即有酸民冷嘲熱諷叫佢「自己去山頂買樓」，甚至建議直接搬屋了事。事主霸氣反擊，直斥「有錢唔使同你講嘢」，更寸爆指「一有問題就搬屋，搬曬十八區移埋民都搞唔掂」，強調即使住私樓一樣會遇到相同問題，搬屋根本唔係解決根本嘅方法。

大批街坊湧入訴苦分享地獄級氣味經歷

事件曝光後，大批公屋街坊感同身受紛紛現身留言，原來受鄰居氣味攻擊嘅住戶多不數。有人大呻經常聞到對面屋傳來豬油味，有人在凌晨時分被鄰居煮即食麵嘅味道薰醒，直呼「凌晨聞到仲慘過聞到煙味」，更有苦主慘訴家中「24小時死老鼠味攻入屋」，形容慘過人間地獄。各路網民亦紛紛獻計出招，「物理防禦派」建議封死門縫、出動空氣清新機或用風扇將氣味反向吹出窗外；「激進反擊派」則笑言一聞到煙味就噴灑模型油、殺蟲水，甚至拉花灑伸出窗外向下射水「以毒攻毒」，令樓主都忍唔住笑言「此方法不錯」。

樓主實測一支擴香瓶逆轉局面味道濃到誇張

激進方法當然只屬苦中作樂嘅玩笑，現實中絕不可行. 綜合眾多意見後，樓主最終決定採用「氣味覆蓋法」，從本地個人護理品牌購入一支驅蟲擴香瓶，由廚房移師到重災區廁所進行實測。樓主事後上載相片分享戰果，笑指擴香瓶味道「濃到有啲誇張」，只插幾支擴香竹籤已經相當攻鼻，成功蓋過鄰居傳來嘅煙味。帖文隨即引來其他苦主熱烈響應，另一位深受異味困擾嘅網民亦曬出自己嘅秘密武器——一部定時自動噴灑香薰機，表示靠濃烈香薰煙霧同樣成功對抗鄰居異味，為一眾公屋住戶帶來實戰參考。