內地水果改個名即貴一倍 事主投訴揭驚人真相

主播狂推混血新品種售價翻倍照樣搶住買

近期內地多個電商與直播平台上，大批帶貨主播高調推銷所謂「混血水果」，包括「芒果鳳梨」、「草莓芭樂」、「蜜桃百香果」等，聲稱係「今年最新雜交品種，每啖都有兩種水果香味」。線下門市同樣大力促銷，一斤「芒果鳳梨」標價19.9元人民幣，比店內普通金鑽鳳梨貴足一倍有多. 消費者齊先生（化名）就因為想食藍莓，喺外賣平台高價入手「藍莓葡萄」，點知到手一睇，根本就係普通葡萄一串，同藍莓無半點關係。

事主投訴反被商家寸爆拒退款惹眾怒

事件曝光後，大批網民替事主不值，紛紛鬧爆商家當消費者係水魚。齊先生向商家投訴時，對方竟然寸爆回應「只係長得似藍莓」，其後雖然將商品下架，但蠻橫拒絕退款，態度極度囂張。而所謂嘅「芒果鳳梨」經翻查農業登記資料，正式品種名稱係「台農23號」，由「黃金鳳梨」同「蜜寶鳳梨」雜交培育而成，基因入面根本冇一絲一毫芒果成分。商家純粹靠改個網紅名就將身價翻倍，擺明係虛假宣傳誤導消費者。

新規2027年實施規範標識亂象有望終結

事件引起媒體關注，報道指出商家利用虛構「雜交」、「新品種」噱頭誤導消費者，已涉嫌違反誠信原則並損害消費者權益. 根據農業農村部2012年發佈、2022年修訂嘅《農業植物品種命名規定》，品種名稱不得令公眾誤認為具備某種特性但實際並不具備。此外，去年發佈嘅《食品標識監督管理辦法》將於2027年3月16日起正式施行，届時包括水果在內嘅食品標識將受到進一步規範，類似改名搵笨嘅亂象有望被遏止。