港女買餸找續揭一蚊硬幣有假｜一個特徵即現形 竟已流通10年

買油麥菜找續揭發一蚊硬幣異樣明顯

事主日前（17日）喺社交平台發帖，上載兩枚一蚊硬幣對比相片，分享自己買餸找續後意外發現假幣經歷。佢指其中一枚硬幣表面呈磨砂質感，圖案細節模糊不清，最離譜係硬幣側面竟然係光滑一片，完全無任何坑紋。根據金管局資料，真正一蚊硬幣邊緣應刻有細密槽紋，光滑側面正正係辨認假幣嘅最明顯特徵。事主更加用磅秤量過，發現假幣同真幣重量相差0.1至0.2克，而該枚疑似假幣上印有「2017」年份。事主自嘲平時根本唔會留意散紙銀，今次係因為準備俾錢時先至察覺有異，即刻將假幣留低收埋。

網民群起分享中伏經歷假五蚊假十蚊統統出現過

事件曝光後，大批網民紛紛留言分享自己撞過假幣嘅慘痛經歷，帖文迅速洗版。有人表示曾經收過兩個一蚊黐埋一齊扮五蚊嘅「合體假幣」，手法之粗劣令人嘖嘖稱奇。亦有網民憶述細個時買嘢找續收過假十蚊，形容該枚硬幣輕飄飄，表面同樣係磨砂質感，字跡粗糙到幾乎睇唔清。另有人上載疑似假兩蚊硬幣相片附和，事主見狀驚訝反問對方側面係咪一樣光滑，更指自己嗰枚假幣上面嘅紫荊花圖案矇到不堪入目。網民鬧爆 “一蚊都呃”，亦有人笑稱假幣係 “稀有品種，可能仲值錢過真嘢”。

同款假幣10年前已被揭發至今仍流通市面

翻查資料，類似假一蚊硬幣早於2015年年中已有市民收過，2016年亦有相關報道，當時描述假幣造工馬虎、表面粗糙凹凸不平，邊框異常凸起，”壹圓” 等字樣邊沿模糊，背面紫荊花紋路欠缺細節，特徵同今次事主發現嘅假幣幾乎一模一樣。有網民亦印證指2017年時已收過同款假幣，驚訝至今仍然存在市面，感嘆 “大家都好少仔細檢查神沙”。事主最終決定將假幣留低作紀念，並發帖提醒街坊日後找續時務必多加留意，尤其要檢查硬幣側面有無坑紋，以免不知不覺間蝕底。