週末輕出走！碼頭落船即達4大隱世靚景 草原野餐/睇億年奇石/漁村打卡
第一站：單車友新據點！馬料水碼頭飽覽吐露港靚景
平時喺沙田、大埔踩單車，係咪通常經過白石角就回頭？而家不妨踩多10分鐘，嚟到全新嘅馬料水新渡輪碼頭！自從新碼頭落成之後，呢度唔單止係前往多個熱門地質景點嘅重要樞紐，碼頭本身都好值得一遊。你可以喺碼頭盡頭欣賞整個吐露港嘅開揚靚景，現場仲設有AR 互動打卡位，可以同可愛嘅吉祥物「工程獅」合照，打卡一流！新碼頭嘅設施亦都非常完善，配備咗Wi-Fi、太陽能照明系統，甚至提供無線充電同USB充電插頭（記得自備充電線！），等船都唔怕悶。加上完善嘅無障礙設施，令上落船變得更安全、更方便，絕對係週末出遊嘅完美起點。
第二站：走入世界級地質教室！荔枝莊睇億年奇石「巨人洗衫板」
由馬料水搭大約半個鐘船程，就可以遠離煩囂，嚟到荔枝莊。碼頭隔離就係地質公園嘅入口，非常方便！沿住海岸線行，來回全程大約1公里，就可以欣賞到各種地質奇觀。出發前可以先睇吓導賞牌，原來呢度嘅岩石已經有1億4600萬年歷史！沿路會見到唔同顏色嘅凝灰岩，同埋佈滿石英脈絡嘅粉砂岩層。行到尾段就係知名嘅「巨人洗衫板」，深灰色嘅碳質粉砂岩層因風化侵蝕速度唔同，形成大型褶曲，睇落真係好似一塊巨型洗衫板！細心觀察，先知每嚿岩石都係大自然獨一無二嘅作品。碼頭嘅另一邊仲有紅樹林、溪流同田野，亦係露營熱點。
第三站：香港後花園！深涌大草原野餐放空睇日落
想搵個地方徹底放鬆？人稱「香港後花園」嘅深涌就最適合不過。除咗可以喺馬料水搭船，喺西沙搭街渡過嚟都好快。由碼頭行大約20分鐘，就會見到香港非常罕見嘅大草原。呢片廣闊嘅草地，最啱約埋朋友嚟野餐，或者帶小朋友嚟盡情「放電」。就算係「I人」自己一個嚟，睇吓書、聽吓歌、望吓個天，都可以輕鬆過一日。除咗大草原，仲可以去參觀附近嘅三級歷史建築「三王來朝小堂」，呢度由傳教士喺十九世紀末建立，仲曾經開辦學校，非常有意義。回程前，一定要留喺碼頭打卡，一望無際嘅海景配上夕陽，真係超浪漫！
第四站：感受漁村風情！三門仔壁畫打卡、漫步連島沙洲
最後一站嚟到充滿漁村文化嘅三門仔村。翻新咗嘅特色壁畫，更清晰咁展現咗漁村嘅歷史同演變過程，等我哋可以了解香港急速發展嘅另一面。想再深入啲了解，可以行入村內嘅大埔地質教育中心。嚟到呢度，仲可以沿住樓梯行去馬屎洲特別地區，中途可以遠眺八仙嶺同大美督嘅景色。行大約半個鐘，全程山路都相對平坦易行，就會嚟到馬屎洲連島沙洲，可以近距離接觸大自然，感受海風。
共建碼頭 連繫山海 改善碼頭更方便
我哋可以咁輕鬆方便去到呢啲郊遊景點，其實全靠土木工程拓展署既海港工程部推展既「改善碼頭計劃」工程。好似今次介紹嘅四個地點，碼頭都翻新同增加咗唔少設施，例如新增浮動平台，令船隻可以更安全咁靠岸，方便村民同遊客出入；碼頭亦增設電子顯示板，等大家對渡輪班次資訊一目了然；同時亦有完善嘅無障礙設施。呢啲改善工程真正做到「共建碼頭 連繫山海」，令我哋探索香港嘅大自然同文化時更加輕鬆便利。
出行小貼士
提提大家，荔枝莊部分海岸喺潮漲嘅時候會被淹沒，出發前一定要check清楚潮汐資訊啊！下次放假，不妨就跟住呢個路線，親身體驗一下改善工程帶嚟嘅便利，一齊發掘更多香港嘅大自然同文化之最啦！
(資料由土木工程拓展署海港工程部提供)
