「中華文化節2026」睇勻中國南北名劇，感受中國戲曲忠肝義膽嘅舞台魅力！

頂尖武生雲集！開幕節目「京劇大武生藝術展演」

今年戲曲節以「京劇大武生藝術展演」揭開序幕，集齊北京、上海、天津、湖北四大京劇院嘅頂尖武生，當中有被譽為「當今菊壇第一大武生」嘅奚中路，聯同多位國家一級演員，以文武並重嘅《長坂坡、漢津口》拉開戰幔。三場演出薈萃南北武戲精華：長靠武生嘅威猛功架，如泰山壓頂；短打武生嘅颯爽剛健，似疾風掃葉。一次過縱覽當代最強武生陣容，感受傳統功架嘅懾人魅力！

南北劇種大晒冷！精選劇目不容錯過

除咗京劇，今屆戲曲節更精選多個地方劇種嘅扛鼎之作，畀你睇盡舞台上英雄人物嘅動人風采：國寶級豫劇大師馬金鳳嘅親傳弟子關美利，率領洛陽豫劇院重現馬派代表作《穆桂英掛帥》——巾幗英姿，氣度非凡；闊別多年嘅河北省河北梆子劇院以頂級梅花獎陣容，上演膾炙人口嘅《鍾馗》——剛正之氣，震懾人心；首度來港嘅晉城市上黨梆子劇院，帶來非一般楊家將劇目《三關排宴》，佘太君同楊四郎嘅家國兩難全，扣人心弦。

鍾意文戲嘅朋友，唔好錯過江蘇省演藝集團崑劇院以古典氣韻融匯當代美學，匠心改編湯顯祖名著嘅《南柯夢》——浮生一夢，盡在唱做之間；而本地觀眾熟悉嘅粤劇則有新編劇目《廣陵散》，由名伶與新秀同台演出，以傳統粤韻重塑魏晉文人風骨。

唔止係睇戲！講座、工作坊、後台導賞——全面體驗戲曲世界

想深入了解戲曲藝術嘅台前幕後？戲曲節仲準備咗一系列豐富嘅延伸活動，俾你全方位感受戲曲文化嘅底蘊：多位參演嘅戲曲名家將會親身主講「藝人談」講座，分享節目嘅藝術特色。另外亦有戲曲文化講座、示範演出、後台導賞、崑劇工作坊等精彩活動。全部活動都係免費入場，惟名額有限，記得預先網上登記留位！另外，戲曲節仲精選咗一系列經典戲曲電影欣賞，票價只需$70，就可以喺光影之間重溫大師嘅風采。

點買最抵？早鳥、套票優惠懶人包

門票現正在城市售票網發售。中華文化節推出多種購票優惠，包括適合一家大細嘅「代代同行1+1優惠」、三五知己一齊買嘅「團體購票優惠」及戲迷必備嘅「套票優惠」。由4月14日至30日期間更設有「閃購優惠」，最高可達七折！記得及早計劃，揀定心水節目，用超值嘅價格享受呢場文化盛宴！

提提你：各項優惠受條款約束，有關各項節目詳情、票務資訊及免費活動登記方法，請參閱相關網頁： https://www.ccf.gov.hk/tc/programme-genres/chinese-opera/

（Presented by LCSD)