【率先直擊】最新開幕 澳門 巴黎人 7大爆點

採訪：Venus@天才女行社 攝影：Mark

01 | 鐵塔分層收費 一𨋢登頂

約兩個月前直擊咗亮燈儀式，今次終於可以近距離接觸，深入塔身，浪漫到反轉再反轉。

要登塔，門票分7及37樓觀景台兩個價錢。但原來鐵塔入口，不在鐵塔底部，而係先要在酒店主樓5樓行天橋進入，進入前還先要經過真・艾菲爾鐵塔歷史長廊，過了天橋就是7樓觀景台，露天平台景色平平，我當然要攻頂，再搭玻璃升降機，不消30秒就一登塔尖！

呢個塔比巴黎真身細一半， 上到去一樣見到交叉網網同路氹全景，MOP168門票係就係肉痛，但俯瞰光城美景、黃昏紅霞，帶拖友來一定冧爆。如果有得好似艾菲爾咁有得徒步攻頂就更好喇！

登塔逐格睇

鐵塔觀景台

開放時間：10 am-10pm
7樓觀景台門票：平日MOP98（小童MOP68）；假日MOP118（小童MOP88）
37樓觀景台門票：平日MOP168（小童MOP138）；假日MOP188（小童MOP158）
備註：逗留時間暫不設時、每晚約7時半至午夜會有閃燈表演

02 | 扣緊浪漫回憶 愛情鎖橋

由酒店主樓通往鐵塔的接駁橋，可以見到一排「愛情鎖」欄杆，原來都是心思位，扮法國愛情鎖橋。大家買返個鎖寫上名字，再同Darling一齊心心雙扣，好肉麻啊！

03 | 北京血鴨欠奉 鐵塔內嘗中菜

預告話巴黎人 鐵塔內唯一餐廳La Chine，竟然吃中菜，好驚氣氛浪漫幻滅，估唔到試完之後嬲嬲唔落、讚好有餘。

一踏入位於鐵塔6樓的中菜廳，即見到塔身鋼鐵支架，與真身相似度極高。我就嗱嗱聲睇下有無傳聞中的「北京血鴨」……係無嘅，除了大路菜式如蒸燒賣、麻婆豆腐之類，La Chine 大玩創意料理如橙味鴨、蘋果咕嚕肉等等。我就最推介黑松露奶黃球、芝士海膽焗生蠔，極度邪惡！食法國菜最怕又貴又唔飽，La Chine 重點是價錢親民平均消費約MOP250，一邊歎景一邊怒食就最啱喇！

04 | 猶如置身凡爾賽 超浮誇打卡位

浪漫之都當然不只鐵塔，酒店內外勁多details浮誇位，我「瓹窿瓹罅」集結影相位大全，誓要餵飽相機！步入大堂即見到25米高拱形天花，中間大噴水池由海神坐鎮，我覺得靚過威尼斯人個金球雕囉。望右即見到check-in大堂；左則是酒店服務大堂，西洋畫作、水晶燈、歐式花地毯等，絕無山寨之感。

1/F 酒店服務大堂

1/F Check-in大堂

1/F 酒店大堂

5/F 巴黎人宴會廳走廊

要拍出Fair Lady 效果，我就發現5樓展覽室外面的走廊，全用Tiffany Blue 牆紙配亮金色調，姊妹不要錯過。

05 | 夢幻房間 鐵塔陪瞓

睇完巴黎人 酒店華麗處處，終於上房喇，一拉開窗簾就可以跟鐵塔Say Hi！酒店有近3,000間客房及套房，共有11種類型，當中三分之一可望正鐵塔景，價錢當然貴點。

我今次率先住「里昂套房」，約770呎，有一房一廳，設計充滿法式摩登之感。一拉開房個窗簾就見到鐵塔，近到猶如喺床邊，可以瞓住歎靚景，晚上更可睇埋閃閃亮燈表演！

06 | 法國文學加持 優雅水世界

位於酒店平台的水世界有驚喜位，先有隻淋水飛船叫「信天翁號」，賣點是熱氣球吊籃，一裝滿水就會向下傾瀉，隨時中招！另外，要挑戰膽量就試試約3層樓高的滑水梯，彎位多又衝又急，管道更是半透明設計，問你怕未？水世界面積唔算大，但收費MOP160可以玩足全日不限時。

07 | 開幕日大放煙花 真・火雞姐撐場

酒店鐵定星期二（9月13日）晚上8時18分正式對外開放，嘩有無咁靚啊個時間。開幕仲請到比利時歌手Lara Fabian及真火雞姐莫文蔚做特別嘉賓，鐵塔上空仲會放晒煙花，其他同集團酒店仲會同步直播，一定好震撼！

$1,398起 巴黎人開幕優惠

入住日期：9月14日至明年2月28日
預訂日期：即日至明年2月28日
住宿：巴黎人雙人豪華大床客房（包早餐或午餐兩份、鐵塔觀景台7樓入場券或THRILLER LIVE C區門票兩張、限量版開幕禮物兩份）
交通：由氹仔客運碼頭乘接駁巴士前往酒店約12分鐘
查詢：www.parisianmacao.com

睇下有咩正嘢：