新同事帶女兒逗利市｜2日後即辭職網民斥厚臉皮：好肉酸

新同事帶女兒逗利市兩日後即辭職

該名打工仔在threads帳號「ririkiki_mi」發帖，透露有新同事於2月初入職，日前趁新年帶同女兒回公司，逐個部門向同事「逗利市」，形容眾人「唔好意思唔派」。不過短短相隔兩日，該同事因找到新工作，便遞交辭職信，故揶揄對方「識玩」。這種先收利市後辭職的操作，令不少同事都感到錯愕。

網民斥責厚臉皮行為直言肉酸

帖文一出隨即引來網民嘩然兼批評該同事的行為。有網民直言「有幾厚面皮要帶個仔（女）嚟公司逗利市？公司風氣？」、「破咗最年輕劫匪紀錄」、「利市收割機」等。更有人表示「以前聽得多拎埋bonus先辭職，第一次聽逗埋利市先辭職」、「都好X肉酸下」，認為這種行為實在令人無語。

更誇張例子曝光離職三年仍回公司逗利市

有網民分享更誇張的例子，指「resign咗3年同事，每年新年keep住帶小朋友返嚟逗利市」，又有人目擊「舊公司係成幢，一層有3至4個部門，目擊隔籬部門已離職女士，過年後帶小朋友上嚟…呢啲真係逗利市」。不過亦有網民認為樓主同事的舉動未算過份，表示「見到可愛小朋友我都好樂意畀利市，好過有啲周圍提人佢有幾多個細路，no show叫你畀利市」。