港夫婦深圳按摩被劏5500蚊！職員稱60粒雞眼網民嬲爆

深圳按摩店職員話術呃錢

事主於Threads發文詳述中伏經過，事發於深圳地鐵老街站A出口某商場按摩店。佢哋夫婦二人各花60元人民幣做腳底按摩，點知兩名大叔職員放低半盆唔熱嘅水浸腳後，就開始推銷脫雞眼服務。職員話「有好大粒雞眼，問脫唔脫？」，太太有需要就答應80元人民幣1粒。職員用家用夾餸夾加小刀，喺佢哋腳板底忙碌咁做嘢，再加黑色消毒液，仲要影相數完成幾多粒。最後職員竟然話佢哋每隻腳底各有15粒雞眼，即係共60粒，索價4,800元人民幣！

網民群起公審鬧爆職員

事件曝光後，大批網民替事主不值，紛紛留言鬧爆職員。有網民直言：「兩對腳共60粒？每對腳6粒都痛到上唔到深圳！好明顯劏死牛！咁狼死！」、「咁X恐怖一隻腳15粒？蓮蓬腳啊？」更有網民笑言：「你哋係應該去申請健力士紀錄，而唔係脫咗佢」。不少網民都指出雞眼唔可能同一時間有咁多粒，「如果有咁多粒一早已痛到死啦」、「咁均勻嘅，唔多唔少，兩個人每隻腳都15粒，是最低消費？」

事主自嘲成水魚提醒網民

事主事後質疑被騙，認為職員係割腳皮當割雞眼，「邊有咁多雞眼，騙子搵藉口呃錢」，自嘲「成功劏咗兩條水魚」。佢仲透露職員想繼續呃錢，話佢有灰甲，但佢堅持話冇，先至「損失小啲」。雖然有網民話「智商數值唔夠，銀紙數目搭夠」，但都有人讚佢肯分享中伏經歷，「希望一傳十，十傳百」，提醒其他港人北上消費要小心。有經驗網民就建議：「下次唔好怕醜！報警！通常公安嚟到佢哋肯打返個對折！」