GM Diet
GM Diet

GM Diet 美國大熱減肥「奇跡食譜」!《新假期》編輯部5人實測!每餐任食+不運動瘦8公斤?附註冊營養師建議|假期實驗室

好生活百科

廣告

GM Diet減肥法大熱!這次《新假期》編輯部5位記者憑著實驗精神,展開了為期一星期的美國大熱「奇跡食譜」GM Diet實測,到底減到幾多?即刻睇睇一星期完整餐單紀錄、體重紀錄及心路歷程分享!

撰文:GW |來源:新假期編輯部、新假期資料室、[email protected]

GM Diet美國「奇跡食譜」減肥
一星期真係減到8KG?

到底甚麼是「奇跡食譜」GM Diet呢?其實GM是代表美國通用汽車公司(General Motors)。1985年,GM為了可以提升員工的健康,從而得到生產效率,因而得到美國食品藥品監督管理局、美國農業部協助而研發的GM Diet。

圖:Ig@icelroomskitchen.bdg
美國「奇跡食譜」減肥GM Diet

號稱「不用運動、極速且健康」的GM Diet是標榜只需7日的時間,有系統地攝取大量低熱量的蔬果,另外,也配合吸收複合式碳水化合物如糙米,並且喝大量水來減重,根據統計,GM員工因為食譜,而平均每人減了約4.5 – 8kg。由於這個方法能在短時間內減肥及見效,不少人用作短期有效減肥的手段,這次編輯部決定實測一星期GM Diet,試試係咪真係減到咁多!

《新假期》編輯部5人實測GM Diet!過程+結果大公開!
GM Diet號稱一星期減到8公斤真唔真?(足本影片在文章最底!)

新假期編輯部5人實測GM Diet!
新假期編輯部5人實測GM Diet!
打開IG@weekendweekly 即可睇到假期實驗室一週IG全紀錄
打開IG@weekendweekly 即可睇到假期實驗室一週IG全紀錄

《新假期》IG:傳送門

《新假期》實測開始!
記者高矮肥瘦全都有 平均減到幾KG?

背景資料:

編輯部參加者共5人,包括:

男記者:Garie
女記者:肥龍、飯飯、菜、苗

6月15日為實測正式開始第一日,初始體重數據如下:

新假期編輯部5人實測!美國大熱「奇跡食譜」GM Diet!每餐任食+不運動瘦到8公斤?女記者一星期激減X KG...!附營養師建議|假期實驗室

GM Diet Test 第一日:
6月15日(一) – 水果日

餐單內容:整天只能進食除了香蕉以外的水果,可少食多餐,不限量任食,另外配上至少8-12杯水。
飲食目的:水果高纖維、低脂、低熱量,另外飲用大量的水加速身體排毒。

第一餐(早餐連午餐) – 奇異果+火龍果+蘋果+梨+橙+士多啤梨+藍莓水果拼盤

第一日第一餐水果拼盤(編按:做媒體食無定時,經常將早餐加午餐合埋做第一餐,壞習慣切勿模仿,以下略同。)
第一日第一餐水果拼盤(編按:做媒體食無定時,經常將早餐加午餐合埋做第一餐,壞習慣切勿模仿,以下略同。)

第二餐 – 與第一餐分別不大 另外加上葡萄

第一日第二餐都係水果拼盤
第一日第二餐都係水果拼盤

第一日的食後感

Garie:「萬事起頭難,第一日真係超辛苦,前一日仲食緊好西,今日就只能食水果⋯⋯好餓,覺得個人好凍,第二朝瞓教起身隻手痺到醒咗,可能無咩血到。」

肥龍:「記得前一晚食咗打邊爐,第一日心諗應該好易過,只可以食生果,但全日個人好肚餓,渾身無力,坐喺office個人係好凍好凍!」

飯飯:「好X凍好X凍!但原來食生果比我想像中飽肚。」

菜:「全日食生果好難捱!周身無力!另外,生果推介食蘋果同梨,奇異果、士多啤梨好酸!但的確幫助排便!」

苗:「第一日減重就全日只可以食水果,感覺身體完全未適應到,好餓好餓。」

GM Diet Test 第二日:
6月16日(二) – 蔬菜日

餐單內容:全日只吃水煮/烤焗/生的蔬菜,早餐可吃一個薯仔,配上至少8-12杯水。
飲食目的:蔬菜纖維豐富、少量蛋白質、脂肪含量極低、薯仔有澱粉可提供能量予日常活動。

第一餐 – 水煮秋葵+紅蘿蔔+焗薯仔/西蘭花/金菇/翠玉瓜

第二日第一餐蔬菜合集
第二日第一餐蔬菜合集

第二餐 -與第一餐分別不大 多了水煮娃娃菜

第二日第二餐都係蔬菜合集
第二日第二餐都係蔬菜合集

第二日的食後感

Garie:「好綠,成檯都好綠,食完個人都清新晒,味蕾得到淨化,比起前一日飽,但食完都係好凍。」

肥龍:「仲未有得去大便,只食菜都開心嘅,學識咗焗菜嘅技巧,發現翠肉瓜同金菇都好好味,食暖嘢個人冇咁凍啊,不過都仲係會餓,無乜熱量,夜晚返到去好早訓。」

飯飯:「屙咗好多屎!食菜叫做有啲暖野落肚,有返少少精力!」

菜:「蔬果可揀茄子、金菇,再配生菜、西蘭花會無咁悶!焗一焗更美味,比第一日飽,但好快餓,同樣無咩力!」

苗:「蔬菜選擇多,烹調方法都多咗,食到多啲唔同嘅嘢。成個人比第一日更飽肚同有精神。」

GM Diet Test 第三日:
6月17日(三) – 蔬菜水果日

餐單內容:全日只吃水果及水煮/烤焗/生的蔬菜,配上至少8-12杯水。
飲食目的:水果及蔬菜擁有高纖維及多種植物營養素,多攝取水果及蔬菜,可讓身體自我修復。

第一餐 – 菠蘿+西瓜+哈蜜瓜+橙+火龍果+奇異果+葡萄+藍莓+士多啤梨

第三日第一餐 水果拼盤
第三日第一餐 水果拼盤

第二餐 – 沙律菜+西瓜+菠蘿+蜜瓜+葡萄+烤茄子翠玉瓜金菇+水煮秋葵

第三日第二餐 水果拼盤+菜菇瓜
第三日第二餐 水果拼盤+菜菇瓜

第三餐 -沙律菜+西瓜+菠蘿+哈蜜瓜+烤茄子翠玉瓜金菇+水煮秋葵

第三日第三餐與第二餐分別不大
第三日第三餐與第二餐分別不大

第三日的食後感

Garie:「早餐食生果原來唔錯,同埋身體好似開始習慣呢種飲食,無咁難捱,個人精神咗,行路都輕盈咗。」

肥龍:「食生果加上蔬菜,選擇彈性較大,但已經有少少厭惡,但都要頂硬上!」

飯飯:「第一餐一食返生果即刻血糖上升,勁眼瞓。但時間比第1、2日易捱。」

菜:「食返第一日同第二日既野,好折磨!明明未飽,但已經食到唔想再食!」

苗:「雖然感覺到身體習慣咗自己食唔飽嘅感覺,但都仲係好想食餐單以外嘅食物。夜晚餓到瞓唔著⋯」

GM Diet Test 第四日:
6月18日(四) – 香蕉牛奶日

餐單內容:8-10根香蕉+4杯牛奶(可改成豆漿)+8-12杯水

飲食目的:香蕉含豐富的鉀質及果膠,提供身體能量。牛奶含鈣、蛋白質、礦物質,補充身體營養所需。

第一餐 &第二餐&第三餐 – 蕉 全部都係蕉+牛奶

第4日三餐都係蕉,全部都係蕉!
第4日三餐都係蕉,全部都係蕉!
由朝食蕉食到晚,一日食8條,之後應該短期內都不想再食香蕉。
由朝食蕉食到晚,一日食8條,之後應該短期內都不想再食香蕉。

第四日的食後感

Garie:「我覺得自己好似馬騮,但今日比前3日是食得最飽的一日。(超市一次過買40條蕉嚇親收銀姐姐⋯⋯)」

肥龍:「最瘋狂的一日!去了三次大便,好暢通愉快,唔使煮嘢食好輕鬆,攪拌機香蕉加奶好好味,但血糖瞬間上升,做嘢時好眼瞓⋯⋯」

飯飯:「估唔到香蕉同豆漿係食得最飽最易捱嘅一日,香蕉加豆漿好好味!焗香蕉到底係邊個諗出嚟,我到依家仲會諗起浸臭底褲味。」

菜:「終於有飽嘅感覺!但一日食8條蕉,好多!建議可作多變化,如製成奶昔,但千萬唔好焗香蕉,極度不推薦!」

苗:「雖然唔太喜歡香蕉,但食落真係方便同飽肚~覺得食咁多條香蕉太辛苦/麻煩的話,可以加牛奶打做milkshake,感覺會攝取得比較輕鬆!」

(編按:新假期編輯部的共識:「食材唔可以平凡地食,煮成其他形態會開心啲。」)

傳說中的「焗香蕉」⋯⋯散發出奇怪的「隔夜臭底褲味」,獲得一致劣評。
傳說中的「焗香蕉」⋯⋯散發出奇怪的「隔夜臭底褲味」,獲得一致劣評。
香蕉牛奶milkshake,一致好評!
香蕉牛奶milkshake,一致好評!

GM Diet Test 第五日:
6月19日(五) – 番茄蔬菜豆肉日

餐單內容:每人6個番茄+水煮/烤焗/生的蔬菜+500g魚肉或雞肉+12-15杯水。
飲食目的:肉類含蛋白質,魚肉更有Omega-3,是補充身體所需的重要元素。

第一餐 – 番茄豆腐湯+蕃薯苗+蒜蓉焗雜菇+檸檬汁羅勒焗鯰魚

第5日第一餐新假期編輯部的共識:「食材唔可以平凡地食,煮成其他形態會開心啲。」所以煮成蕃茄豆腐湯(無添加)
繼續發揮創意,將食材煮成不同美食,例如番茄豆腐湯(無添加)。

第二餐 – 與第一餐大同小異 加上焗茄子及清蒸星斑魚

第5日第二餐
第5日第二餐

第五日的食後感

Garie:「成餐都係我煮有啲攰lol,只用極極極少量調味,終於有返小小食家常飯的感覺,滿足飽肚!」

肥龍:「全靠Garie幫手煮!真係豐富又好味,調味到位,焗魚原來可以咁正!!!番茄豆腐湯暖胃又飽肚,之後減肥餐會繼續食,少咗澱粉質個人感覺好輕盈。」

飯飯:「有Garie神嘅加持,終於有餐係食得飽!!如果日日都係咁食法,我係可以繼續~」

菜:「可以食返肉,簡直人間美味,而且有蔬菜,均衡營養,飽!另外全靠有Garie大佬,發揮強勁廚藝,食到世上最好減肥美食!」

苗:「有肉食喇!係7日內食得最飽最享受嘅一日~ 食返有少少調味嘅食物,感動!」

GM Diet Test 第六日:
6月20日(六)- 水煮/烤蔬菜日

餐單內容:500g魚肉或雞肉+水煮/烤焗/生的蔬菜+8-12杯水。
飲食目的:混合多種身體所需的營養素及纖維。
(編按:因為星期六及日是休息日,全員星期五已提前做好飯盒帶回家吃)

食飯盒紀錄

第6日各自自律食飯盒
第6日各自自律食飯盒

第六日的食後感

Garie:「放假係應該食好西⋯⋯但呢一刻嘅我唔可以背叛隊友!聞咗當食咗No Problem!」

肥龍:「星期六要靠自己啦!好想念隊友!!!好彩Garie煮定俾我哋,翻熱就得啦,但見到親朋好友開大餐,心情難免有忐忑,但心諗仲有一日,不要放棄!」

飯飯:「出街食飯係煎熬!見住朋友食肉無得食係最痛苦!我要食肉啊X!!!」

菜:「六日最難捱,望住大家食好野,有得睇冇得食,而且無同伴一齊,好孤單!」

苗:「假期無同伴互相監督住,要自律!」

GM Diet Test 第七日:
6月21日(日) – 糙米蔬果汁日

餐單內容:2碗糙米飯+任何蔬菜&水果都可進食,或打成果汁飲用。

飲食目的:果汁可助身體排毒,高纖糙米也可以幫助消化,提供身體能量。
(編按:因為星期六及日是休息日,全員星期五已提前做好飯盒帶回家)

食飯盒紀錄(飲品是紅菜頭+甘荀+蘋果打成汁)

第7日各自自律食飯盒+飲果汁
第7日各自自律食飯盒+飲果汁

第七日的食後感

Garie:「父親節無得喪食垃圾食物,感覺有啲怪,雖然今日有飯落肚但感覺好餓,果汁同蔬菜太單調,無肉食係差小小。」

肥龍:「最後一日!第一次試紅菜頭、蘿蔔、蘋果打成汁,顏色超似巫婆湯,飲落口都有青味,尚可接受,食糙米飯加少少蒜蓉好正!」

飯飯:「最頭暈嘅一日,暈到要即刻食啲提子先見好轉。但紅菜頭加蘋果加甘荀比我想像中好飲。見大家無破戒,更加覺得唔可以再破戒,唔可以辜負大家!」

菜:「只有蔬菜同飯,依然冇咩力,出街都好易攰!而且好快餓,要快快趕回家吔飯!另外,撞正父親節,但冇得食好嘢,好慘!」

苗:「最後一日,堅持!父親節,帶埋餐盒同屋企人出去食晚飯,望住成枱餸,我只能食自己準備好嘅糙米飯同菜。」

GM Diet Test 第八日:
6月22日(一) – 完結及結算日

圖1)體重變化紀錄
圖1)體重變化紀錄
圖2)體脂變化紀錄(只作參考,普通家用體重機數據不一定準確。)
圖2)體脂變化紀錄(只作參考,普通家用體重機數據不一定準確。)
圖3)BMI變化紀錄
圖3)BMI變化紀錄
女記者肥龍激減4.4KG,瘦到懷疑人生!
女記者肥龍激減4.4KG,瘦到懷疑人生!

5人GM Diet實測完結感想

Garie:「終於完咗地獄一星期,成單嘢係我提出要實測,所以好似無資格怨辛苦?!Btw感謝有隊友互相扶持!經過呢一個星期覺得自己除咗體重下降咗以外,最重要嘅係身體係輕盈咗健康咗,成個人無咁水腫,屋企人都話我瘦咗一個Size,同埋皮膚明顯好咗。如果是想短期內有瘦身效果的話可以試試,但長期維持的話千萬不要,一來太辛苦,二來食蛋白質不夠會減少身體肌肉量!長遠減肥都係要靠控制飲食,有時間就要運動啦~」

美國大熱減肥「奇跡食譜」GM Diet!重《新假期》編輯部5人實測!每餐任食+不運動瘦8公斤?附註冊營養師建議|假期實驗室
正在煮蕃茄豆腐湯的Garie

肥龍:「冇諗過減到咁多!全靠隊友無條件陪伴我,體重上其實只有我需要減肥,但佢哋都不辭勞苦,陪我買餸煮飯食餐單,更加意識到自律的重要,原來澱粉同糖對人體咁大影響,食少一點個人更加精神,建議大家可以試試,可做到排毒效果,個人感覺更加輕盈,回想返都唔係咁辛苦,因為有同事滿滿嘅愛,難得減到少少,就唔想放棄!我要爭氣呀!!!!!!!」

美國大熱減肥「奇跡食譜」GM Diet!重《新假期》編輯部5人實測!每餐任食+不運動瘦8公斤?附註冊營養師建議|假期實驗室
真正主角肥龍

飯飯:「如何在無油少調味情況煮到大餐請睇我哋拍嘅片!其實有一班朋友同你一齊食係最開心,呢一個星期好似去咗ocamp咁,每日買餸煮飯就過一日,雖然口講好辛苦,但實際上都幾享受。不過問我要唔要再嚟多次就不了,因為太易反彈,同啲皮會鬆啊X!!!」

美國大熱減肥「奇跡食譜」GM Diet!重《新假期》編輯部5人實測!每餐任食+不運動瘦8公斤?附註冊營養師建議|假期實驗室
覺得啲皮鬆咗嘅飯飯

菜:「最重要係要有人陪你一齊減,會冇咁痛苦!但其實呢個餐單有點太極端,瘦是必然,但同時亦一定會反彈,最重要係之後都要keep住健康飲食,或者可以當呢次係一個改變,從此提醒自己唔好太放肆亂食!」

美國大熱減肥「奇跡食譜」GM Diet!重《新假期》編輯部5人實測!每餐任食+不運動瘦8公斤?附註冊營養師建議|假期實驗室
菜:均衡飲食最重要!

苗:「覺得GM DIET雖然能有效減重,但飲食上比較極端,唔可以長期進行,適合想急住短期減磅嘅人。雖然好似好廢話,但最重要真係平日要養成好嘅生活同飲食習慣(屋企人話我呢星期後皮膚明顯好咗)。認真控制飲食,食清啲,效果已經會好好。想試GM DIET又自制能力較低嘅朋友,有同伴一齊互相扶持會好好多~會記住呢7日嘅美好回憶,多謝同事!」

美國大熱減肥「奇跡食譜」GM Diet!重《新假期》編輯部5人實測!每餐任食+不運動瘦8公斤?附註冊營養師建議|假期實驗室
苗:我有一日無飲晒啲牛奶..
減肥最緊要有朋友陪你一齊,事半功倍呀!
減肥最緊要有朋友陪你一齊,事半功倍呀!

註冊營養師Michelle專業建議+Q&A:

Q1. GM Diet能快速減重的原因是?

A1. GM Diet餐單上每一日的平均卡路里攝取量大約800-1,000卡路里,而成年男性及女性每日需要分別攝取約2,200/1,700卡路里,在消耗量大於攝取量的情況下,體重快速下降是正常的。

Q2. 以GM Diet減掉的體重,真的是「減肥」嗎?

A2. 在數據上可以看到,5位的體脂率都沒有太大改變,甚至有兩位有上升的情況,減掉的只是水份或有機會是肌肉,而正確的「減肥」是令體脂率下降。

Q3. 建議減肥人士使用GM Diet嗎?

A3. 不建議,尤其有糖尿病或血糖不穩的人士切勿嘗試,可能會有健康風險。使用餐單的人士因為吸收的熱量過低,新陳代謝會減慢,可能會出現專注力不足、無精神、情緒變差、活動力下降等問題。

Q4. 其他建議?

A4. 營養師一般建議減重速度為1星期0.5-1kg左右,以編輯部5人為例,進行GM Diet一星期後,每人至少減重1.5kg,最多減4.4kg,但減重速度過快對身體不是健康的跡象,所以還是建議想減肥的人士,進行健康飲食及配合運動,長期而有效地進行。

Nutrilicious(營養顧問) - 註冊營養師Michelle
Nutrilicious創辦人 – 註冊營養師Michelle
Michelle Lau 是營養顧問公司NUTRILICIOUS 的創辦人及首席營養師,致力於鼓勵及教育亞洲數百萬人,讓他們吃出健康美麗人生。Michelle和她的團隊積極教育所有受眾採用均衡有營飲食生活模式,並為不同媒體、品牌、機構主持烹飪示範和健康講座。

Nutrilicious 營養顧問公司
網址:Facebook

足本版影片

https://youtu.be/58bgfB8Y7Lc