「香港非遺月」開鑼！非遺精華遊蹤影片出爐 6區文化寶藏等你發掘

介紹「香港非遺月2025」重點活動之一嘅「非遺精華遊蹤」影片已經陸續推出，等你輕鬆認識香港六大區嘅非遺瑰寶！😍今次特別精選油尖旺、荃灣、大埔、沙田、東區和離島區（大澳）六個地區，製作一系列「非遺精華遊蹤」影片。每條影片都介紹該區嘅非遺項目，包括傳統手工藝、節慶習俗、飲食文化等，讓市民同遊客可以足不出戶，也能探索香港豐富多元嘅非遺。

香港非遺月2025 – 探索社區文化寶藏

「香港非遺月2025」期間，全港將有超過80場非遺表演、60個非遺互動體驗攤位，全部免費開放畀市民同旅客參與。活動內容豐富，涵蓋超過100個香港同內地嘅非遺項目，包括粵劇、舞麒麟、舞龍、舞獅、舞貔貅、英歌、木偶戲、吹糖、鋪金箔同贛南客家擂茶製作技藝等等，務求令唔同人都可以從多角度、唔同方式接觸同欣賞非遺。非遺辦亦積極聯同社區團體，例如文化推廣組織「非遺六月」、嗇色園、保良局、東華三院等，協力籌辦各項非遺相關活動。

非遺精華遊蹤影片 帶你遊六區探索本土瑰寶

為咗方便大家探索社區特色非遺，「香港非遺月2025」特別精選咗六個地區，包括油尖旺、荃灣、大埔、沙田、東區同離島區，製作咗一系列「非遺精華遊蹤」影片，並且已經陸續推出。呢啲影片配合埋相關地區嘅「非遺精華遊蹤」參考地圖，等大家可以跟住影片同地圖，自己去發掘隱藏喺社區中嘅文化寶藏，由自己去探索香港地方文化特色，以文塑旅，以旅彰文。

油尖旺區：老行業嘅傳承故事

油尖旺區嘅「非遺精華遊蹤」影片，會帶領大家穿梭繁華鬧市中嘅老店，發掘蒸籠製作技藝、坐月薑醋、木雕刻技藝、傳統鄉村建築修繕工藝、麻雀牌製作技藝、首飾製作技藝等等，你可以了解到呢啲傳統手藝點樣喺社區紮根，一代傳一代，感受濃厚嘅老香港情懷。

荃灣區：展現傳統表演與節慶嘅活力

荃灣區就展現區內充滿活力嘅一面。大家可以從中欣賞到舞麒麟等傳統表演嘅震撼，認識螳螂拳嘅武術文化。此外，影片亦會介紹瓜子製作技藝、雲吞製作技藝等充滿地道色彩嘅非遺項目，感受荃灣獨特嘅社區面貌。

大埔區：尋味傳統地道小食

大埔區嘅「非遺精華遊蹤」影片，將會帶大家進行一趟味覺之旅，會介紹豆品製作技藝、茶粿製作技藝、涼茶、菠蘿包、港式奶茶、蛋撻製作技藝等，全部都係令人食指大動嘅地道美食同飲品。睇完，不妨參考地圖去搵食，親身品嚐呢啲充滿人情味嘅傳統滋味。

沙田區：圍村文化與節慶習俗

沙田區就會聚焦喺獨特嘅圍村文化同相關節慶習俗。影片會介紹車公誕嘅熱鬧情況，欣賞舞獅嘅精彩表演，仲有燈帶編織技藝、紮作技藝同點燈等傳統習俗。透過鏡頭，大家可以了解到沙田區深厚嘅歷史底蘊同獨特嘅社區文化。

東區：漁港風情與技藝傳承

帶大家探索東區昔日漁港嘅風貌，影片內容包括木船製作技藝、傳統跌打、洪拳、紮作技藝、涼茶、打麵技藝，以及譚公誕等。呢啲非遺項目反映咗東區嘅歷史變遷同居民生活，充滿地區特色。

離島區（大澳）：水鄉風情與獨特習俗

離島區(大澳)嘅影片，將會帶領大家走進呢個充滿魅力嘅水鄉。會介紹大澳端午龍舟遊涌呢個國家級非遺項目，仲有鹹魚製作技藝、蝦膏蝦醬製作技藝、茶粿製作技藝、漁網編織技藝，以及關帝誕同楊侯誕等獨特節慶。跟住影片，你可以感受到大澳與別不同嘅水鄉文化同生活節奏。

一連六集「非遺精華遊蹤」影片已陸續推出，請瀏覽：

https://youtube.com/playlist?list=PLORtPpqkBDsfanZDt_4qHrw5iiZa35QXw&feature=shared

想知更多「香港非遺月2025」嘅精彩活動詳情？快啲去非遺辦嘅網頁 ：https://www.icho.hk/tc/web/icho/hk_ich_month_2025.html

今個六月，約埋屋企人同朋友，一齊投入「香港非遺月」嘅連串精彩活動，發掘香港本土文化嘅魅力啦！

（Presented by：LCSD）