鹽田梓一日遊行程!5大打卡影相位:曬鹽體驗+玉帶橋!附船期資料|香港好去處
鹽田梓一日遊行程!5大打卡影相位:曬鹽體驗+玉帶橋!附船期資料|香港好去處

鹽田梓一日遊行程!5大打卡影相位:曬鹽體驗+玉帶橋!附船期資料|香港好去處

鹽田梓船期稀疏,但依然吸引不少外區人前往,全因有「香港後花園」之稱,空氣新鮮,有300多年歷史,打卡位多,加上現在更開放曬鹽體驗,睇得又玩得!即睇由西貢出發的船期,及5大推介影相打卡位!

撰文:新假期編輯部|圖片:新假期圖片庫、網上圖片

鹽田梓一日遊行程+船期!

前往鹽田梓嘅方法,大家可以去到西貢碼頭乘坐街渡直接到達,在通記海鮮對出購買船票,或者見到街渡停泊位置,必定有好多嬸嬸問你去唔去行下,大家唔駛怕搵唔到。

街渡嘅來回票價為成人$60,呢張票已經包括已包括參觀文物室、曬鹽場、玉帶橋等景點,及島上地圖一份。

鹽田梓船期由朝早10點至下午3點出發,每隔一小時一班;而回程船期由中午12:20開始,最後一班為下午5點,所以大家最好早啲出發,下午3點先去就太趕了。

建議路線:
村公所→鄉誼茶座→百年老樟樹→澄波學校→聖若瑟堂→玉帶橋→鹽田

鹽田梓 週末遊 01
買來回船票時會附送島上地圖,上面會標示清楚每個景點位置。

1. 村公所改建 鄉誼茶座

食係好重要㗎!所以去到每個地方都要搵下食!嚟到鹽田梓當然都要搵下有咩食啦!雖然唔多選擇,但村公所改建嘅鄉誼茶座就有村民親手整嘅客家茶粿,有多款味道比客人揀,包括南瓜、艾草、鹹味、雞屎雞、杏仁、仲有大熱嘅紫薯!除咗客家茶粿,村民仲會煲五花茶,羅漢果茶同落神花,煲完放入雪櫃雪到凍一凍,行完一圈個島買嚟降溫就最爽喇。

鹽田梓 週末遊 13
有多款味道比客人揀,包括南瓜、艾草、鹹味、雞屎雞、杏仁、仲有大熱嘅紫薯!

2.化身文物館 澄波學校

依家喺香港嘅村校真係買少見少,如果話校址仲可以保留舊貌的又有多少呢?來到鹽田梓,村民活化咗呢間島上唯一一間學校:澄波學校,將佢變身成為鹽田梓 嘅文物館,入面分咗做唔同嘅區域,例如家居生活、農業器具、考古發現等,等大家可以清晰知道及了解文物以前嘅用途。

鹽田梓 週末遊 03
入面分咗做唔同嘅區域,例如家居生活、農業器具、考古發現等。

3.文化遺產優異獎 聖若瑟堂

鹽田梓又叫教友村,其中聞名嘅原因係村內所有村民都信奉天主教,教堂仲喺2005年獲得聯合國教科文組織亞太區文化遺產優異獎!唔係講笑,教堂真係幾靚㗎,外面冇太多嘅裝飾,十分簡潔,而入面嘅彩繪窗、十字架同聖母像都好靚,除咗靜修同祈禱,影返幾張靚相都唔錯㗎。不過要記得係教堂內要保持安靜啊。

鹽田梓 週末遊 15
教堂喺2005年獲得聯合國教科文組織亞太區文化遺產優異獎!
鹽田梓 週末遊 18
入面嘅彩繪窗、十字架同聖母像都好靚。

4.連接滘西洲 玉帶橋

行去玉帶橋之前要先行一條山路,鍾意行山嘅人就啱哂喇!不過冇行開山嘅人都唔駛驚,條山路除咗多咗幾條斜岥之外,其實都幾好行嘅,中間仲有兩個涼亭比大家小休一吓,但記住真係要帶夠水唔係就會渴死,翻過座小山就到玉帶橋㗎喇,一眼望去有啲似摩西過紅海,因為條橋都分開咗個海做兩邊,從橋望出去會見到幾艘船喺海中央,個景又係啱哂嚟影靚相,角度一拎得啱真係點影都靚啊!

鹽田梓 週末遊 02
行到山中,有條好靚嘅小道,記得喺到影返幾張靚相!
從橋望出去會見到幾艘船喺海中央,個景又係啱哂嚟影靚相。
從橋望出去會見到幾艘船喺海中央,個景又係啱哂嚟影靚相。

5.村內標誌 鹽田

去得鹽田梓冇理由唔去埋鹽田睇吓啦,唔係點算係去過鹽田梓先!不過,時代變遷令曬鹽正作式微,村民都往外跑尋找舒適嘅工作,同時每鹽田失修。直至2011年,舊村民希望更多人認識鹽田梓的歷史,又得到不少義工協助,開始在假日舉辦導賞團行程 ,還原傳統製鹽方法,將近乎失傳的工藝活現大家眼前,大家也不妨入手一樽香港製造的鹽!

 

鹽田梓為香港碩果僅存的鹽場。
鹽田梓為香港碩果僅存的鹽場。
鹽田梓 週末遊 28
鹽田梓自家出產嘅鹽。

鹽田梓

開放時間:星期六、日
交通:西貢碼頭通記酒家對出乘搭街渡,時間約15分鐘。
鹽田梓船期:
西貢碼頭開出: 星期六、日及公眾假期:10am-3pm(每小時開出1班)
鹽田梓碼頭開出: 星期六、日及公眾假期:12:20pm、2:20pm、4pm、5pm
網址:http://www.yimtintsai.com/
備註:若乘搭村內官方街渡,船票已包含參觀鹽田、文物館以及教堂的費用。如果是另外坐船登島的市民,則要捐$20參觀費作營運之用。

撰文:新假期編輯部|圖片:新假期圖片庫、網上圖片

 

最新吃喝玩樂資訊