出海釣墨魚！15分鐘船程即到＋專家親教技巧＋即釣即煮
撰文：GW ｜拍攝：發
釣墨魚團 夏天出海4小時夜釣
市區15分鐘即到 初嘗爆釣＋即煮鮮甜魷魚
每年的釣墨魚季節大約在3-8月期間，5月至7月更是釣墨魚旺季。今次參加的墨魚散客團，20人成行，船上空間闊落，總共可以容納25-40人。墨魚團由晚上7點半起行，11點半返航，以為得4個鐘就釣唔到啲咩？少年你年輕了，當晚拍攝船上共8人，總數估計有過百隻收穫，記者當晚雖然釣得3隻左右（有小小心虛），但船家稱第一次釣已算不錯！
船家會提供釣墨魚工具，新手也不用擔心綁鉤等問題，專家會提供協助，無論是事前工具的準備、釣墨魚時教你技巧、抑或事後釣到幫忙解鉤，甚至炮製多款不同的料理，通通都會幫你處理好，真係上船去玩去食就得！
至於技巧方面，船家教路，只要將八爪鉤照一照燈光，待八爪鉤吸收光線變得螢光後放下海約4-5米深，然後不時輕輕拉一拉，墨魚會被發光的鉤所吸引，追上並「攬實」魚鉤，「Chok墨魚」就是在形容這個動作。船家稱，真正高手就會感受到墨魚「攬實」魚鉤的感覺，再拉扯一下將魚鉤鉤實墨魚，直接拉上水，但記者完全感受不到魚鉤被墨魚「攬實」的感覺，看來這就是經驗的差距呢！
旁邊有經驗的朋友，一隻又一隻墨魚釣上水，而記者只釣到寥寥可數的數量，心底不禁都有小小羨慕，不過第一次嚟講有成功釣到已經好滿足！全船結算時釣到超過100隻，屬爆釣情況，船家挑選體型較小的墨魚即場烹調，你可能會問點解要揀細隻而非大隻？因為船家表示細隻口感更好更鮮甜！至於大隻的墨魚就可以帶回家。
墨魚即釣即食 水上人食法最原汁原味
今次船家用最傳統的水上人的烹調方法，不去除內臟及墨汁原隻烹調，若客人要求也可代為處理內臟再烹調，但記者就當然要試最原汁原味的食法啦！船家先將墨魚作清洗，然後再燒紅煎鑊，加入墨魚先輕輕煮一次，將水份逼出再倒出。然後第二次燒紅煎鑊，再加入油，倒入墨魚炒香，熟度差不多就加入些小美極醬油提香，這時船上經已滿溢香噴噴的味道，超級吸引！
即釣即煮的墨魚口感滑嫩爽口，味道鮮甜，起初以為墨味會有怪味，但原來會帶有一種獨特的香氣，鮮釣墨魚與街市購買的墨魚確實有分別，試過可能返唔到轉頭！如果想帶回家，自行烹調享用也可，但既然來到，就不如試試船家的料理啦！
船家預計今年的墨魚高峰期可持續至7月底左右，想參加的朋友就要抓緊墨魚季的尾巴，一嘗爆釣快感及即席料理的美味體驗！墨魚船無論是包船、散客團都歡迎，不用擔心人數不足就參加不了的問題。另外，除了釣墨魚外，這裡也提供日間夜間釣魚團，讓大家也可以多一個活動選擇。
- BB Boat Channel
- Facebook：BB BOAT Channel
- IG：bb_boatchannel_852
- 聯絡電話：6652 2308
- 墨魚團日期：即日起至另外通知
- 墨魚團出發時間：7:30pm-11:30pm
- 價錢：墨魚散客團$240（星期一至四）、$260（星期五至日及公眾假期）（20人起成團）；另提供包船服務，詳情可向船家查詢。
- 上船地點：中環、尖沙咀、觀塘、油塘、筲箕灣
