海洋公園 夏水禮 熊大 James 同你瘋狂濕身!

一年一度嘅海洋公園 夏水禮 又嚟喇,今次仲會有一大班LINE FRIENDS同你一齊濕身,製造「LINE夏日狂熱」,而James更加係第一次嚟香港添!7月1號開始,LINE FRIENDS會出現喺公園嘅不同角落,除咗玩水,佢哋仲會同大家瘋狂快拍,而且海洋公園亦特別推出一系列期間限定嘅LINE食品同精品,粉絲們要留意!

6大濕身區域

「LINE夏日狂熱」除咗係全亞洲首個LINE主題玩水派對,仲係少見嘅室內玩水設施,今個夏天一定要join呢個消暑派對!

1. 瘋狂滑水梯

你Slide我又Slide,雖然冇一千幾百呎長,但係呢個高三層樓嘅瘋狂滑水梯,就絕對夠斜夠衝力!唔好睇佢只係個滑梯,但係瀡落嚟原來都有離心力,真係唔講得笑!

2. 超級大水桶

高掛嘅大水桶會慢慢儲水,夠重之後就會照頭淋落嚟,絕對係必到嘅影相位!而且最緊張嘅係,你永遠唔知大水桶幾時先會滿瀉,分分鐘一開口講嘢就會成口都係水!

3. 狂野泡泡派對

喺動感燈光同充滿活力嘅音樂下,可以同朋友一齊喺泡泡中熱舞,而且仲不時會有大量泡泡從天而降,所以唔少人都會向住泡泡出口位跳「求泡舞」,都幾壯觀!

4. 動感水韆鞦

韆鞦喺香港已經買少見少,而呢個水韆鞦,更加係今年 夏水禮 首創,可以來回穿越水幕,又可以有兒時嘅回憶!

5. 勁爆水彈陣

今年 夏水禮 繼續有往年大熱嘅水彈陣,唔好以為掉水彈毫無技巧,如果眼界唔好,水彈射唔中對手不特止,仲會喺自己頭頂爆開!

6. 幻彩噴泉陣

呢個噴泉絕對老少咸宜,噴泉陣入面嘅水柱有唔同嘅花式同速度,加上特別嘅燈光效果,係另一個影相位!

LINE FRIENDS 出沒注意

夏水禮 除咗玩水,又點少得同一眾LINE FRIENDS互動一吓!

1. LINE互動照相館

大家可以喺呢度,選擇同不同嘅LINE FRIENDS「合拍」,拍一段5至10秒嘅短片,透過LINE應用程式,喺海洋公園帳號 (hkoceanpark) 輸入特定編號,即時睇返合照,佢哋有幾識攝鏡!

2. LINE FRIENDS快拍

以夏日至HIT造型現身嘅一眾LINE FRIENDS,會喺色彩繽紛嘅海底佈景前同大家合照,開心集郵!

期間限定 LINE主題美食及精品

喺 夏水禮 期間,海洋公園特別開咗LINE FRIENDS Pop-Up Store,有超過60款首次喺香港發售嘅主題精品,包括多款LINE印花T恤、文具、毛公仔等等,仲有好多地方都斷晒市嘅LINE貼紙添!

另外,海洋公園嘅餐廳亦推出多款LINE食品,包括水都餅店嘅LINE Cupcakes、曲奇同凍飲,海龍王餐廳嘅LINE特色套餐同兒童套餐,大熊貓餐廳嘅LINE特色便當,絕對適合相機食先嘅香港人,不過佢哋咁得意,實在係睇到都唔捨得食!

除咗以上嘅遊樂設施,7月5日至25日期間,LINE用戶加入「LINE夏水禮」嘅LINE官方帳號,並發送「Summer Splash」字句,即可獲電子刮刮卡,有機會賺取日本雙人來回機票!

 

海洋公園夏水禮- 亞洲首個LINE主題室內玩水派對

日期:2015年7月1日至8月30日
票價:成人$345,小童 (3至11歲):$173
查詢:3923 2323

 

延伸閱讀

可口可樂 最新6款「百年經典」杯 必讀開箱文

日租$133豪裝海景 青年宿舍

荔園 懷舊攤位遊戲熱身賽

新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!

最新吃喝玩樂資訊