海洋公園 哈囉喂 一人靈床尖叫體驗

上星期為大家介紹咗6間鬼屋,記者不禁對今年嘅 哈囉喂 表示失望,點知原來今日先係打大佬!今日記者再次化身試玩敢死隊,挑戰其餘4間鬼屋,結果嚇到不停尖叫,驚嚇指數爆晒錶!

逃出陰屍路

講到明同FOX合作,將美劇The Walking Dead嘅場面真實咁呈現眼前,果然冇令人失望!鬼屋入面有好多劇集經典場面,監獄、巴士、切人肉,樣樣有齊!而且最特別嘅係,鬼屋入面嘅演員唔會一味嚇你,部份演員其實係你嘅人類隊友,提你要小心喪屍,仲教你逃生路線添,投入度超高!不過有時反而會俾呢班人類隊友嚇親,因為佢哋嘅打扮實在太似普通人,以為佢哋係前面嘅玩家,冇諗過會突然入戲同你講嘢!

驚嚇度 ★★★★☆
值得排隊指數 ★★★★☆

魔偶凶靈工坊

呢間鬼屋以木偶為主題,入面嘅嘩鬼演員全部化身成玩具,邀請各位哥哥姐姐留低陪佢哋玩。聽落以為係行可愛路線,點知比想像中驚!以玩具為題材呢件事,本身已經令到成屋玩具嘅記者有d驚,而且入面嘅佈置好細緻,用咗好多唔同嘅染血玩具同公仔佈置,代入感更高。加上其中一間房漆黑一片完全冇燈,周圍不斷有唔同嘅聲音同你講唔好走,叫你留低同佢玩,令到怕黑嘅記者毛管戙!

驚嚇度 ★★★★★
值得排隊指數 ★★★★★

H15

終於嚟到全城熱話H15!一入到去就會幫你影張車頭相,之後會出現喺你嘅靈堂入面,真係大吉利是!之後就正式瞓上靈床進行死亡體驗,不過上去之前要除鞋除襪,唔知係咪因為咁,過程入面成日覺得腳板底陰風陣陣,更加心寒!

一路上會由靈堂開始,經歷破地獄、火化、審判、十八層地獄等等,最後就會經過奈何橋,從孟婆手上接過孟婆湯同利是,咁就可以重生喇!瞓喺靈床上感覺好被動,唔知將會被送去邊,又唔知到底掃到你嘅係d咩,而且天花不時會有燈光效果加強驚嚇度,真係好心寒好驚!

雖然話就話一個人玩,不過一路上會有仵作推住你行,如果去到任何一個位覺得太驚,都可以大叫暗語,示意仵作停低,咁就可以離開鬼屋。

驚嚇度 ★★★★★★★★★★(真係爆晒錶呀!)
值得排隊指數☆☆☆☆☆(係唔洗排隊㗎!因為H15所有死亡籌都係網上預約,因為反應熱烈所以新增最後兩輪登記!)

多啦A夢哈囉喂影城

睇完咁多恐怖嘢,都要睇返d可愛嘢平衡返!呢間鬼屋入面完全冇鬼,反而有好多好多好多多啦A夢角色同你影相,一心入嚟玩鬼屋嘅記者見到佢哋都想瘋狂同佢地合照,絕對係粉絲們必到嘅影相位!

驚嚇度 ☆☆☆☆☆
值得排隊指數 ★★★☆☆

海洋公園 哈囉喂 全日祭2015

日期:2015年10月2日-11月1日(其中18個特選日子)
時間:10am-11pm(周末及公眾假期)10:30am-11pm(平日)
普通票價:成人$345;小童(3-11歲)$173
哈囉喂 優越門票:成人$690;小童(3-11歲)$345
「H15」預約網址:http://h15.oceanpark.com.hk

延伸閱讀
海洋公園 哈囉喂 2015 真係有10間鬼屋?
免費 鬼屋 挑戰心魔 驚過畀鬼嚇【樂富】

最新吃喝玩樂資訊