捧在手心的月亮 自製人氣 月球燈 【觀塘有乜玩】

熱爆網絡嘅 月球燈 ,原來唔止台灣有,香港本地亦有製作,仲係工作坊形式,可以 DIY一個屬於自己嘅 月球燈!一嘗將月亮捧喺手心嘅感覺!

今次嘅 月球燈 係用硅膠模以及ABS樹脂膠製作,雖然製作過程唔難,但係由造模到上色,都需時4-7小時不等。聽到呢個時間,不禁流咗兩滴汗,製作時間實在係有d長,記者整到後期都有少少呆。

月球燈 嘅模具由導師一早預備好,去到只需要落膠水倒模就得。不過都唔好睇小呢個工序,因為模具相當重,而且要分十次去倒模,每次都要拎住模具搖一分鐘,少d臂力都唔得!

完成倒模之後,就要等大約半個鐘,等乾嘅時候,導師會教大家製作小型硅膠模具,可以為 月球燈 加上小小點綴。

不過記者試整嘅時候,同場嘅4位學員,有兩位嘅成品都唔太成功,成品唔夠圓又或者乾唔到。咁係因為倒模嘅時候膠水份量落得唔啱,又或者係搖嘅時候搖得唔均勻,咁樣就會整唔到一個靚嘅圓形㗎喇。計落,其實失敗率都有d高,所以學員們真係唔好睇少倒模呢個步驟!如果唔係,就會白白浪費咗幾個鐘。

乾透之後就可以進行打磨,然後上一層保護光油, 月球燈 就完成喇!

今次試整嘅 月球燈 ,著咗燈之後真係好靚,完全俘虜咗記者嘅少女心,可以將月亮捧喺手心嘅感覺實在太sweet喇!不過咁,由於始終係初學者手製,整出嚟會有唔少瑕疵,有機會因為太薄而有破洞,又有機會因為太厚所以睇落一撻撻好似月蝕咁,不過呢個就正正係手作嘅特別之處,一日未整完,一日都唔知製成品係咩樣,隨時有驚喜!

I.R Industrial Revolutionary月球燈工作坊

地址:觀塘鴻圖道76號聯運工業大廈5A室
電話:3153 2870
Facebook:I.R Industrial Revolutionary
價格:$480

由台灣橡果藝術工作室設計嘅 月球燈 始祖LUNA,十月初會喺香港全新網上生活平台 “unun” 獨家開放預購,終於唔洗捱貴運費喇!由台灣訂返嚟,計埋運費,最細嘅XXS都要$90美金,即成七百蚊港幣,而家只係$580就可以喺香港買到喇!

同香港嘅唔同,LUNA係用玻璃纖維製成,製作時間長好多,絕對唔係幾粒鐘可以完成嘅事。

LUNA 一共有七種尺寸,分別係XXS (8cm)、 XS (15cm)、 S (20cm)、 M (30cm)、L (40cm)、XL (50cm)、XXL (60cm),售價由$580起。(括號內為直徑)

新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!
想最快接收第一手的旅遊飲食資訊?Easy!
1. 先分別讚好「新假期周刊」及「新假期Jetso 」兩個Facebook專頁
2. 在「讚好」按鈕下揀選「搶先看」,搞掂!

最新吃喝玩樂資訊