大美督放假好去處！免費上山下海體驗營+水上活動

Jul 22 2025

放假想同屋企人、朋友遠離城市喧囂，投入大自然懷抱？位於大埔嘅大美督嘅戶外活動場地係你今個暑假唔錯嘅選擇！呢到有船灣淡水湖嘅清幽湖景同山景，仲有各式各樣嘅免費戶外活動等你嚟挑戰！由香港青年協會（青協）主辦嘅「活動體驗日營」與「露營體驗1+2」，以及與香港女童軍總會、香港青年旅舍協會（YHA）合辦嘅「多元體驗日營」、「上山下海宿營」及「有營開放日」，只要年滿8歲，不論你係學校、團體或公眾人士，都為你提供豐富嘅戶外體驗。無論你係想挑戰水上活動、運動攀登、游繩下降，還是享受露營樂趣，大美督都能滿足你冒險嘅心！最正嘅係，所有活動費用全免，等你無負擔地玩得盡興！

探索大美督：青協免費活動率先睇

今次為大家介紹嘅連串活動，全部都係屬於由香港賽馬會慈善信託基金捐助嘅「賽馬會Campsite+ 營舍新發現計劃」，目的就係想鼓勵更多市民走出戶外，體驗香港獨特嘅自然美景同戶外活動樂趣。打頭陣嘅係由香港青年協會（青協）喺大美督戶外活動中心舉辦嘅兩個免費項目：「活動體驗日營」同埋「露營體驗1+2」。青協大美督戶外活動中心環境清幽，設施齊備，絕對係進行戶外活動嘅好地方。無論你係追求刺激嘅朋友，定係想同家人朋友共享悠閒時光，都照顧到你嘅需要。

青協主辦：日營+露營，輕鬆開啟戶外體驗

活動體驗日營：一日High爆水陸挑戰

想像喺一個陽光燦爛嘅周末，喺船灣淡水湖旁邊同朋友一齊挑戰水陸活動，笑聲不斷，水花四濺？青協嘅「活動體驗日營」就係專為8歲或以上嘅戶外活動愛好者設計， 24人成團，由朝早9點到下晝4點，集合地點係香港青年協會大美督戶外活動中心。你可以選擇試玩獨木舟、立划板、龍舟、竹筏體驗，或者喺陸上玩羅馬炮架、運動攀登、緣繩下降同陸上歷奇活動。由專業教練全程睇實，初學者都玩得放心！由朝早玩到黃昏，呢個日營好似一個小型戶外活動派對，畀你滿載回憶返屋企！

露營一加二：兩日一夜星空下戶外派對

如果一日活動未夠過癮，仲想喺戶外搭帳篷，夜晚數星星？「露營體驗1+2」等你進一步沉浸喺大美督嘅自然魅力中，同埋呢到有洗手間同淋浴設施，一家大細或者露營初哥都唔使驚。呢個兩日一夜嘅活動適合8至24人，首日下晝4點入營，第二日下晝4點離營，集合地點係大美督戶外活動中心。營地提供4人帳篷，參加者只需要自備食物同貼身露營物資，就可以親手打造屬於你嘅Camping體驗。重可以選擇玩唔同活動，安全又刺激，保證你玩到唔捨得走！就算係帶住小朋友嘅家庭，或者係第一次試露營嘅朋友都非常適合！

兩日行程：

第一日：到達、搭帳篷、晚餐（自備）
第二日：早餐後玩兩場各2小時嘅活動，揀水上或陸上項目

喺大美督露營，夜晚同朋友圍坐聊天，朝早玩划水，呢種Chill同刺激並存嘅體驗，絕對係人生Bucket List必試！

三機構合辦：多元活動探索無限可能

若你想體驗更豐富嘅活動組合，由香港青年協會、香港女童軍總會同香港青年旅舍協會聯手打造嘅「多元體驗日營」與「上山下海宿營」將帶你進入另一層次嘅戶外體險！呢兩款活動同樣由香港賽馬會慈善信託基金捐助，費用全免，並喺「大美督三大場地」——香港女童軍總會梁省德海上活動訓練中心、香港青年協會大美督戶外活動中心同YHA白普理賽馬會大美督青年旅舍舉行。

多元體驗日營：一日三重驚喜

想喺一日內體驗團隊遊戲、高空挑戰同美食創作嘅多重樂趣？「多元體驗日營」就啱晒，24人成團，朝早9點半到下晝4點，集合地點係梁省德海上活動訓練中心。參加者會分組試三項活動，每項2小時，仲有大會提供午膳。由羅馬炮架嘅歡笑聲，到運動攀登嘅心跳加速，再到小食製作嘅滿足感，呢個日營好似一個小型戶外嘉年華，適合一家大細、學校或公司團體，仲可以全面發揮個人潛能！

活動內容：

羅馬炮架：團隊活動，親手制作竹炮架發射水彈，考驗協作能力，樂趣無窮
運動攀登/游繩下降：高空活動，挑戰自我
小食製作：動手整輕食，輕鬆有趣。
（圖片來源：香港青年協會）

上山下海宿營：兩日一夜深度探索

想嚟一場更深入嘅戶外探索？「上山下海宿營」呢款兩日一夜嘅活動24人成團，活動同樣喺3大場地舉行，並提供營舍住宿，等你喺大自然中過夜，感受星空下嘅寧靜。首日安排4小時的1至2項活動，例如羅馬炮架、手工藝製作、生態遊、獨木舟VR體驗或運動攀登；翌日則有另一場4小時活動，可選擇獨木舟、立划板、運動攀登等項目。大會提供早餐及晚餐，參加者只需專注享受活動，無需為膳食操心。

有營開放日｜即興Walk-in 大美督開戶外派對

突然想出走大自然，但又唔想plan太複雜？「有營開放日」呢個大型活動接受現場報名，最多200至400人參加，喺三大場地舉行，靈活又方便！由獨木舟、立划板嘅水上體驗，到羅馬炮架、運動攀登嘅陸上挑戰，參加者可以即場揀心水活動，隨時同新朋友組隊！約埋朋友或者一家大細同埋小朋友一齊參加都無問題！