免費 鬼屋 挑戰心魔 驚過畀鬼嚇【樂富玩乜好】

臨近哈囉喂,嘩鬼空群出動,玩 鬼屋 亦係指定動作。不過今次呢間恐懼心戰室,有別於一般 鬼屋 ,唔係靠嘩鬼嚇你,而係挑戰你內心底線,要過關就要克服心理恐懼! 鬼屋 位於樂富的露天廣場,由7個相連貨櫃組合而成,冇華麗嘅布置、演員亦冇恐怖妝容,但係驚嚇度絕對唔低過其他 鬼屋 ,而且最重要係免費入場!

曱甴堆填區

呢間以堆填區為題嘅 鬼屋 ,絕對挑戰潔僻者底線,由於 鬼屋 由貨櫃組成,空間唔大,所以入到去好容易掂到周遭嘅「昆蟲」,加上地下不間斷播放住過萬隻曱甴爬行嘅畫面,對於驚昆蟲同曱甴嘅女孩子嚟講,真係少d膽量都行唔到!

驚嚇度★★★★☆

迷魂漩渦

呢間鬼屋就冇乜特別,因為以鏡做主題已經唔係咩新鮮事,而且貨櫃空間唔大,加上試玩嘅時候係日頭,陽光由出口處滲入,好快就可以成功搵到出口。

驚嚇度★★☆☆☆

漆黑發聲森林

現場漆黑一片睇唔到路,加上突如其來嘅音效,都咪話唔驚!而且記者咁啱最怕蛇,見到森林入面嘅蛇蟲,仲驚過畀鬼嚇呀!

驚嚇度★★★★☆

變態實驗室

實驗室挑戰你嘅觸覺同嗅覺,可以話係全程入面最恐怖驚嚇位!玩家要估中圓筒入面嘅味道先可以繼續旅程,至於係咩味就保持神秘感,只可以講句,雖然唔難估,但係頂唔順嘅人都真係會幾難受!

實驗室挑戰你嘅膽量,限時30秒,需要喺18個小櫃入面搵出鎖匙,每格都有唔同道具,假眼、假手同你大玩心理戰!記者足足花咗30秒去掙扎伸唔伸手入去小櫃入面,結果一格都摸唔到,細膽得過份!

驚嚇度★★★★★

幽閉凶間

全程最似傳統鬼屋嘅一關,燈光暗,好多布條遮掩視線,嘩鬼隨時出現,而且啲道具仲有少少18+禁囉~

驚嚇度★★★☆☆

方程迷陣

玩家要喺限時30秒入面,解開數獨之謎,搵出密碼就可以逃出生天。雖然難度一般,不過會有嘩鬼演員喺側邊不停騷擾你,專注力少d都唔掂!

驚嚇度★☆☆☆☆

今次挑戰嘅恐懼心戰室,對玩遍鬼屋無敵手嘅記者嚟講,絕對驚過畀鬼嚇!雖然唔係用鬼嚟製造驚嚇位,但全程一樣咁緊張,加上不斷要挑戰心理底線,就好似玩緊萬聖節版密室逃脫,考膽量又考智慧!如果你都好似記者咁,玩傳統鬼屋玩到厭,不妨挑戰吓呢間恐懼心戰室,測試吓自己係咪真係咁大膽!最重要嘅係,免‧費‧入‧場!

恐懼心戰室

日期:9月18日至10月31日(逢星期五至日及公眾假期)
時間:5pm – 10pm
地點:樂富廣場B區露天平台(顯示地圖
門票:免費入場

延伸閱讀
海洋公園 哈囉喂 2015 真係有10間鬼屋?
5款必買 星空 精品!牆上星空皮鐘+天花月球燈
新假期周刊 電子書:
ios:https://itunes.apple.com/hk/app/xin-jia-qi-zhou-kan/id722179449?mt=8
Android:https://play.google.com/store/apps/details?id=com.weekendhk.newsstand2&hl=zh_HK

新假期食玩報料:[email protected]
歡迎Instagram / facebook 使用#weekendhk 報料,資料一經選中會為你公告天下!
想最快接收第一手的旅遊飲食資訊?Easy!
1. 先分別讚好「新假期周刊」及「新假期Jetso 」兩個Facebook專頁
2. 在「讚好」按扭下揀選「搶先看」,搞掂!

最新吃喝玩樂資訊