港人轟黃大仙酒樓特登落錯單收多錢 $698套餐埋單竟變過千元！

酒樓食飯$698套餐埋單變過千元！

近日，一位網民在Facebook群組分享了一篇文章，控訴自己和家人在黃大仙豪苑中心的一間酒樓用餐時遭遇不公待遇。她回憶，當時她選擇了價格為$698的晚市套餐B，這個套餐的份量足夠她和五位老人家及工人姐姐享用。但在結帳時被店員指需要付超過$1,100的金額，事主感到驚訝便即時向店員詢問原因。

店員反怪責事主：「你食咗喇喎」

疑惑之下，事主發現收據居然變為價值$998的套餐A，但枱單則清楚寫明套餐B，相信是酒樓職員落錯單！事主反映事件，但酒樓的店員冷靜地回覆：「你食咗喇喎」，事主不滿更反駁：「我叫 B餐，你手寫枱單都係B餐，仲寫埋價錢 $698，你地落單就 A餐？趁住全枱老人家傾計，冇留意食咗，伱地就可多$300？」，指責店家是有意為之，目的是要收多食客三百元。店員再回應：「你冇留意條魚唔同？食之前你唔出聲？而家你食咗，你享受咗，咪當同老人家食餐豐富啲囉⋯⋯」。

事主聽到即感到憤怒，她點出套餐A和套餐B之間的主要區別只在於蝦 、龍蝦和魚的品種，其他的菜品則完全相同。事主不甘表示指老人家顧識聊天，因此一時沒有留意，餐廳卻有逼他們硬食之嫌！而且店員反應自然，對答流利自如，事主有理由相信此類事件並非第一次發生，控訴酒樓店員明顯刻意落個貴餐，收貴幾百蚊！事主再指老人家事後非常肉赤，「離開酒家仲好唔憤氣，亦好唔明究竟落單嗰個錯，定係食嗰個錯！」，同時他們一家亦發誓以後不再去此間餐廳。

網民意見兩極！

不過網民就意見兩極，有部分網民指出蝦和龍蝦之間的差異是很容易分辨的，照理不會食錯，「蝦球同龍蝦都分唔到？」、「食完先發覺？」，亦有網民替事主辨解「如果老人家，唔奇」、「我其實唔明白點解個客有責任要識分，如果要話個客唔覺有分別，咁點解唔問由落單，廚房，到出菜，上菜，都唔識分？ 如以上不同崗位嘅職員都唔識得分別嘅時候點解客人要識分呢？ 」

亦有大部分網民認為是酒樓的錯誤，顧客不應該承擔這個錯誤的後果，紛紛勸事主應要報消委會或報警處理，「張枱卡都有寫B餐，梗係俾B餐嘅價錢，你送錯關人乜事啫，點解唔報警」、「佢見你哋老人家多， 睇死你唔敢搞大件事 ，應該報海關，有證有據，一定告得入」、「去消委會，check埋閉路電視，有晒證據係不知情情況下食咗，冇理由要埋呢張單」、「係間酒樓唔啱！上菜前無理由唔知係出錯菜，但唔理照出，食完錢照收」。

另有網民指兩邊都有錯：「嚟錯就應該出聲，唔係照食，冇理由蝦同龍蝦都唔識分， 酒樓都有錯， 打成平手！」、「侍應入錯A餐；跟住上錯龍蝦、星斑；老人家諗住著數，唔出聲，食咗先講；老人家唔肯埋單」。