Ben Sir不忍學童問題無人理　決定開Talk「教港媽做老母」　網民：憑咩呢？

Ben Sir心痛學生問題　決定開Talk「教老母做老母」

近日本港接二連三發生學童自我了結生命的悲劇發生，一向關注學童身心發展的Ben Sir有見及此，近日在Facebook宣布將於11月24日，在灣仔舉行一場免費講座「教老母做老母」，希望能跟父母圍爐，暢談與子女溝通和輔導。而一眾「老母老豆」可獲優先報名， 但不適宜携帶兒童進場，因爲在兒童背後說兒童會比較安全，名額共50人，先到先得，額滿即止。而消息一出，一眾港媽旋即洗版留言，稱「好想報名」，Ben Sir 隨後宣布超額報名8倍，會另作安排。

Ben Sir：我希望教育局可以多D關注

Ben Sir教父母如何與子女相處，受盡一班港媽歡迎，而他在接受傳媒訪問時，更指留意到近年社會少了談起相關議題，以往有這類事情發生，報章或電視都會有廣告呼籲大家珍惜生命，甚至教育局會派心理醫生輔導學生，但現時未知因何而減少，希望教育局正視問題，不要讓社會感覺只關心夜繽紛。而一眾得知Ben Sir出自好心而舉辦活動，都紛紛表示支持，指「有時父母真係唔夠仔女口才好，鬧又怕關係差，唔鬧又好似當你無道，做人父母真係好難，有D情況唔識處理，希望可以學到嘢」。

有網民同樣慨歎，表示「唉，講咗咁多年，死咗咁多個，政府都冇解決過問題，最多最多只係作咗個slogan “求學不是求分數”…學校… 只重視成績好嘅小朋友，成績差已經被老師當透明，因為資源有限」、「仲生每個2 萬，而家有能力的，唔生唔係為咗2 萬生活費，而係overall package 。 香港教育制度，學生情緒問題唔敢生。2 萬只會繼續鼓勵為錢生育的人」。

網民反斥：你其身不正，點教人？

有人大讚Ben Sir好嘢，但亦有不少網民狂留負評，指「個個生出都要政府教？咁你生佢哋出來做乜x」、「唔識做父母就唔好生， 唔好又賴落政府」、「唔通二選一咩，你有心就幫下個社會，唔係抽水搏呼聲，博出SHOW賺錢」、「貓哭老鼠，不忘抽水」、「我以為教人講粗口就叻啫，原來抽水仲叻，到底憑乜講嘢」、「其身不正，由以前就教講粗口，而家教人做爸媽教仔，點教？講粗口教？」、「夜繽紛同學童兩件事有衝突？你可以提意見，但不要用這樣的方法…能有本事，你做特首啦，或者教育局長…最低都做個校長吧？你都係老師和家長…你做了什麼」、「只係教呀媽，唔教呀爸？」；不過亦有人即時再反駁，指「你好似講X到啲父母，生完個細路天生就識教。大佬呀你都要讀書啦，父母都係摸着石頭過河，俾啲同理心啦」。

Ben Sir’s Academy: 關愛呈獻《教老母做老母》講座
“Ben Sir見家長！”

日期時間：2023.11.24（五），1930-2100
地點：灣仔皇后大道東43號東美中心8樓803室
主講：歐陽偉豪博士 （Ben Sir）
目標：跟父母圍爐,暢談與子女溝通和輔導
對象：老母老豆優先 (其次教育界、社福界人士) [不適宜携帶兒童進場，因爲在兒童背後說兒童會比較安全] 名額：50人，先到先得，額滿即止。（講座有錄影，完結後會公開，故不設網上直播）
協辦及贊助機構：香港星光獅子會