Gemini｜AI免費生成《海賊王》通緝令 神級指令3步化身懸賞犯！
零門檻簡易操作 揀相極講究
要製作呢張專屬通緝令，操作過程其實非常簡單。首先，大家只需要打開手機或者電腦上已經登入嘅 Google Gemini 頁面。準備好之後，就可以點擊對話框旁邊嘅「上傳圖片」按鈕（通常係一個「+」號或者相機圖案），揀選一張你想轉換嘅人物照片。小編私心建議大家挑選五官清晰、正面，而且表情豐富嘅半身相，例如大笑、戚嘴笑或者自信得戚嘅樣。因為根據實測，表情越生動，生成出嚟嘅通緝令效果就會更加傳神，完美還原海賊嗰種獨特嘅狂傲霸氣！
一鍵複製「魔法指令」 極速生成
上傳好圖片之後，最關鍵嘅一步就係輸入指令。你唔需要自己諗點樣形容，只需要直接喺對話框入面複製並貼上以下呢段為大家準備好嘅「魔法 Prompt」，然後撳發送，Gemini 就會自動幫你搞掂晒：
「請將這張照片中的人物轉換為《航海王》的懸賞單。人物需以尾田榮一郎標誌性的漫畫風格繪製，具有誇張的比例和充滿動感的表情。懸賞單本身是陳舊、泛黃的羊皮紙，邊緣有燒焦痕跡和咖啡污漬。頂部有粗體的「WANTED」字樣，肖像下方寫著「DEAD OR ALIVE」，底部則是貝里（Berries）單位的懸賞金額。背景有海軍標誌的水印。肖像應呈現捕捉人物動態的自信苦笑模樣。紙張角落有別針留下的針孔。」
進階玩法：隨心自訂懸賞金與型格配件
如果你覺得預設嘅款式未夠喉，想張通緝令更加有個人特色，其實仲有獨家嘅進階玩法！你完全可以喺上面段指令嘅尾段，用文字加上自己嘅客製化要求。例如，你可以隨心自訂懸賞金額，叫 AI「將底部的懸賞金額設定為 1,500,000,000 貝里」；又或者為人物加上專屬配件，好似「加上一頂草帽」、「咬住一支玫瑰花」甚至「戴上一副型格黑超」。就連人物嘅表情狀態都可以微調，將原本嘅「自信苦笑」改成「戰鬥受傷後依然狂傲大笑的模樣」。只需短短幾秒鐘，一張極具漫畫風味嘅泛黃通緝令就會新鮮出爐！大家快啲 Save 低個教學，整張 Send 畀朋友或者放上 IG Story 瘋狂打卡啦！
