臥底旅行團3.0｜$0北上睇樓團師奶怒斥被賣豬仔　主持勇救團友：當我哋係咩

$0北上睇樓團豪飲豪食　睇樓經紀貼身服侍

由主持阿正和妹頭擔正的HOY TV節目《臥底旅行團3.0》，會潛入到不少低價旅行團體驗實況，而最近一集他們參加了其中一個2日1夜$0北上睇樓團，據宣傳單張所指，行程除了有睇樓環節之餘，還會有4A溫泉、露營燒烤、濕地公園等活動參加，看似非常豐富。而出發當天，早上8時左右集合，大約10時終於上到珠海，一上車導遊已即時熱情地介紹自己，並帶大家到第一個位於港珠港大橋附近的樓盤睇樓。

經紀看到團友後，即主動埋身銷售，指第一個樓盤是整個珠海最頂級公寓，而參觀的單位經紀指有300多呎時，整團團友包括妹頭都即時反駁，指「呢度頂多咪130呎，或者200呎」，此時經紀即指「唔係，呢度面積都有300呎㗎，我哋唔係計實用面積，係計建築面積㗎」。聽到此，妹頭已即時極大反應，表示「吓？？？？？」。

主持講價激嬲女經紀：你訂咪訂囉

之後團友便被帶到一個會議室，有不少經紀已積極推銷，並向團友指「幫你哋計吓個數呀」。而當場亦有女經紀埋阿正和妹頭身，指「呢個盤就大約120萬」，二人於是嘗試講價，指「可以平到幾多，例如話做唔做到60萬」，當阿正說完這句話後，女經紀反應極大，並嘲笑道：「60萬？一半？一定做唔到呀話你聽，首期都60萬啦⋯⋯你確定要呢個盤呀，我幫你問吓」，阿正即時指「確定我就唔駛講價啦，就係講價先確定到要唔要㗎嘛」，而女經紀後來亦開始動火，指「你訂咪訂囉，唔訂咪唔訂囉，D錢喺你個袋，我又唔會拎你張卡」。

團餐8餸1湯超抵食：仲送多2個餸畀我哋

結果當然沒人買，團友都表示「太細，我上嚟買樓係度假㗎嘛，咁細點得」。而後來旅行團就轉場食飯，當大家以為$0團費的待遇一定好求其時，結果又令人喜出望外。阿正和妹頭指，午餐有8餸1湯，餐廳額外再多送2碟小炒給他們，相當不錯，加上$0付出，認為已經很不錯。

食完午餐，旅行團繼續去睇多2個樓盤，看似相當正常，但其實行程已Skip了「溫泉」環節。而餘下的2個樓盤，一個為酒店式住宅，一個為較為偏僻的中山市小鎮住宅。雖然妹頭指中山的單位「有得諗」，但經過低調調查後，一眾團友都是0人簽單，即使經紀努力推銷，但團友都認為「一係太細，一係太遠」而沒有心動。不過即使無人交易，導遊仍然保持良好態度，沒有壓逼團友購買單位。而到晚上，吃完團餐後，導遊更有安排戶外BBQ，令一眾團友「食得開心，玩得開心」，唯一不滿的是由於住宿的酒店是新開張，在安排上房時足足要人等1小時，令部分團友不滿。

師奶團友大鬧被賣豬仔：你哋就自己住好嘢，我哋就住垃圾

不過入到房後，由於酒店新開張，所有設施都應該是第一手使用，所以主持人都表示滿意。而正在大家都以為已安頓好時，原來另一邊廂有團友「被賣豬仔」。節目中可見，一群團友（包括老人家、師奶、叔叔）在酒店門口大鬧，原來酒店沒有安排足夠的房間分給團友，起初她們被分到一間有3張大床的房，對方指「你要雙床大床房就我帶你去，無講過係住邊度，帶我哋遊花園，又大雨又大風，吹到我哋好狼狽，好奔波，去不知名旅館同民宿，地方又污糟，開頭話好近，徒步行咗1.5公里」、「要我哋住旅店，安排晒你哋住好嘅我哋就住垃圾，你無咁多房就唔好接我哋啦，你當我哋係咩啊」。

而2位主持亦在現場了解，導遊指「今日係5.1呀，我有個團，隔離公司有個團，無咁多房」，但據了解，被帶到民宿的團友一早報名，但為何會沒有足夠房間？導遊即解釋，「例如我報個團，收10個人，但你突然聽日又叫多2個朋友，多咗2個人，唔知點加返房，我哋連酒店員工嘅宿舍都拎出嚟啦而家，安排緊但仍欠幾間房」。而主持人得悉後，決定讓出一間房間，替團友解決問題，事後導遊亦有親自上房向受影響團友道歉。

網民：免費仲想點呀？

網民除了大讚2位主持無得頂外，同時批評根本團友和旅行團公司2邊都唔抵幫，指「其實個個都喺度呃， 班老人扮買樓其實想去免費旅行、個酒店話仲有位照收人、賣樓呃人就唔駛問啦、搞團就畀d老人入去湊人數再收發展商錢，結論就沒有半個是無辜的」、「免費有食有玩有得住還要吵，貪得無厭，零團費應該預左啦，觀乎已經好好招待啦！人性真係」、「唔係有生意畀人做以後咪參加人哋嘅零團。。只顧自己著數，人哋招呼你唔使出糧？出得嚟搵食個個都有頭家要養㗎？浪費人時間仲要呢樣嗰樣」、「聽佢咁樣嘈，以為佢畀咗好多團費，無畀錢仲嫌三嫌四」、「酒店背景寫：Expect the unexpected」、「過貪字得個貧，小學都有教啦，阿婆。如果冇妹姐阿正，你肯定住民宿呀」、「2邊大家呃大家，打和啦」、「已經食得好又無畀人逼畀錢，算係咁」。