男拔生失蹤｜曾憲哲同張善鵬失蹤事件竟有2大相同之處 網民：巧合到奇怪
「張善鵬失蹤4日事件」︳自稱「好邪！」後即失去聯絡
「西貢結界」除咗有名丁利華事件之外，仲有「張善鵬失蹤4日」事件。2016年時，行山友張善鵬於大蚊坑失蹤4日3夜後尋回，獲救半個月後於facebook講述4日3夜的經歷。張善鵬行山首日佢早上出發，途中見到天氣轉差，就決定下山，仲喺facebook出post指「忽然好想落雨」。post一出即時行埋雷，張善鵬又喺facebook留言「好邪！」，然後張善鵬就同外界失去咗聯絡。
「張善鵬失蹤4日事件」︳突然失去咗知覺 醒返喺灌木叢中
張善鵬表示當時佢突然失去咗知覺，醒返時自己喺灌木叢中，當時已經係晚上8點幾，個人懵吓懵吓咁，後來收到屋企人的電話之後就醒返，即刻搵路離開。張善鵬認為自己失去知覺係因為雷電而導致。
「張善鵬失蹤4日事件」︳行行吓唔見咗銀包同手機
張善鵬因為無諗過自己行到入夜，無帶照明的工具，落山係靠月亮光摸黑搵路，間中用手機睇gps，跟住行行吓唔小心唔見埋銀包同手機。張善鵬表示當中其實應該留喺原地等天光先走，但因為同屋企人講咗返緊屋企，剛好又唔見咗電話，就心急想搵路離開。
「張善鵬失蹤4日事件」︳行極都無縮短到距離
剛開始落山都好順利，點知行咗幾十米之後覺得唔對路，點解行極好似都無縮短到距離咁，個人又出現血糖過低的問題而懵吓懵吓，即刻將剩下的energy bar食埋，但個人食完都係迷迷糊糊，跟住無落到山，反而入咗山谷休息。
「張善鵬失蹤4日事件」︳第2日. 遇見相熟行山友
第2日醒返後天已光，張善鵬就繼續搵路走，期間發現一條石澗，就沿住走，行行吓唔知點解又會行返轉頭，張善鵬表示唔知係咪自己唔夠精神定出現幻覺。然後仲遇到相熟的行山友，點知叫極佢都無反應，追上去一轉眼又唔見咗人，繼續行又再見到另一位認識的行山友，又係叫佢都無反應，張善鵬仲為咗追上行山友搞到自己跌親整損雙手，然後唔知點解又返去大水潭邊休息。
「張善鵬失蹤4日事件」︳第2日. 遇見兩三層高紅磚建築物
休息咗一陣，張善鵬繼續搵出路，就向下游方向右邊樹林探路，覺得嗰邊啲樹好疏落相對易行，行行吓竟見到一座紅磚砌的建築物，佢形容係「一座好大的兩三層高建築物，唔係村屋」點知衝到入去只係見到樹木，唯有掉頭走，而嗰時張善鵬係有遇到直昇機低空周旋，但因為唔知係搵佢，認為自己只係唔咗一日，唔知屋企人已經報咗警，所以無理會到。去到黃昏時間，張善鵬又再遇到認識的人喺樹叢跑出嚟，又係叫唔應，一直追住佢點知又離奇地唔見咗。
「張善鵬失蹤4日事件」︳第3日. 身旁環境完全改變 有人玩水、墳地
去到第3日，張善鵬瞓醒後發現自己臨瞓前擺喺一旁的煙、火機、兩枝行山杖都唔見咗，而身旁的環境都完全改變咗，同埋自己30個鐘無食嘢都竟然完全唔餓。張善鵬再搵路想逃出，點知去咗一個舊墳地，沿途全都係一啲帶刺或倒鈎的植物，搞到佢唯有折返。今次張善鵬直接落水澗行，行咗半個鐘竟然見到人玩水，即刻走過去，點知又係去到唔見晒人，但旁邊就有一間荒廢的石屋，佢形容同當時個環境非常唔協調。張善鵬再次折返後又無再見到人同屋，形容真係好奇怪。張善鵬再次返去大水潭邊休息。
「張善鵬失蹤4日事件」︳第4日.石頭入面傳出聲音 再遇到墳場
第4日，張善鵬醒返又發現現場環境又唔同咗，仲有一個奇怪的現象，就係周圍啲石頭入面都有聲傳出，佢形容「就好像走進一條屋邨，每個單位都有些聲音傳出一樣，如傾偈聲、吵架聲、電視收音機声等，而啲石頭就好似每個唔同嘅單位咁」。張善鵬繼續搵路，途中又望見到墳場，張善鵬表示雖然知道見到墳埸就知有路走，但係唔明點解西貢西灣一帶無啦啦有墳場，所以今次決定走開揚的路線，爬澗落山。途中聽到勁多人聲，同埋唔少人閃過同埋玩水，但佢都唔理了，去到四叠潭終於似乎遇到真人，佢就問人借咗手機同屋企人報平安。
「張善鵬失蹤4日事件」︳第4日.張善鵬無被任何蚊叮蟲咬過
最後張善鵬走到鹹田灣時遇到警察，而且因為佢已經3日無食嘢就去咗醫院。佢表示之前唔見咗的火機同煙，唔知點解最後會搵得返，仲要咁多日喺山上都無被任何蚊叮蟲咬過，笑指住院時就反被蝨咬咗十幾啖。張善鵬強調呢個真係佢本人親身經歷，可能有出現幻覺，但絕對唔係發夢。
「張善鵬失蹤4日事件」︳YouTuber分析張善鵬可能有猝睡症
後來有YouTuber分析張善鵬似乎可能有猝睡症，症狀相似。而今次拔萃男書院曾憲哲失蹤事件，唔少人認為與張善鵬事件有2大相同之處，「幾乎係一模一樣，離奇到好邪」，首先大家都認為曾憲哲「無可能完全無穿無爛經過9號風球同黑雨，一D傷痕甚至蚊咬都無」，和張善鵬一樣無穿無爛；而且「又係幾日唔食嘢都捱過咗」，認為兩件事「唔係巧合咁簡單」。不過亦有網民指男拔生失蹤事件確實疑點重重，但有可能與結界無關，而是小朋友貪玩。
