灣仔海濱藝遊坊10.1放煙花要停夜市？檔主收通知改營業時間：到底有無腦？
發展局：簽約時未有通知檔主
對於海濱事務委員會港島區海濱發展專責小組主席何文堯的言論，發展局就指一場誤會，指「招募攤檔商戶時政府尚未確立及宣布，10.1國慶當日會有煙火匯演和相關安排。於9月22日才通知相關檔主當日只能開放到下午4時。」網民得悉後即嘲「真係衝出嚟X，人哋交租做生意，呻幾句都唔得，仲好似覺得人嘈嘈閉咁」。
海濱事務委員主席：你咪唔好簽囉
繼昨日坊間一面倒鬧爆主辦方的處理方法後，今海濱事務委員會港島區海濱發展專責小組主席何文堯再度反擊！他於一電台節目訪問中表示「好奇怪」。事關與夜市檔主簽協議時，當局已一早通知10.1晚上要暫停營業，「你簽落去嗰時知有呢個條款，如果你覺得真係好大困難，咁你咪唔好簽囉。但你簽咗落去之後，你而家又話係一個好大嘅瑕疵，或者shockfall（震驚），咁我就覺得唔係咁好」。他補充指認為該時段暫停營業不一定會影響生意，反而大家睇完煙花就有好大機會去夜市消費，換言之對夜市生意可能更有幫助。
灣仔海濱藝遊坊夜市｜發展局轉口風：可在晚上指定時間營業
灣仔「海濱藝遊坊」美食區檔主今早表示收到通知禁止檔主於10.1下午4時後做生意，令檔主大呼失望，指「人多唔係刺激經濟，係刺激緊檔主！」而到今下午，發展局突然改口，稱警方經過進一步評估後，認為國慶當日上址的日間時間可放寬至下午5時；同時，原本禁止晚上營業的夜市可於晚上時段重開，指定在晚上10時半後重開營業，閉場時間最遲為凌晨2時。聽到消息後，網民即指「睇完煙花散晒場先嚟開，主辦真係好大量，好為檔主著想，唔知會唔會停收幾個鐘嘅租呢」、「睇完煙花返屋企，同埋有無人會咁夜掃街都係問題」、「算啦，大家都認清一個事實」。
灣仔海濱藝遊坊夜市｜灣仔海濱檔主突收通知 10.1停辦夜市！
香港夜繽紛，夜市活動受人矚目，有不少檔主都期望長假期加上慶祝活動，可令港人及遊客晚間出動並願意消費。繼昨日灣仔「海濱藝遊坊」正式開鑼時，遇到供電問題令檔主束手無策後，今又有消息傳出檔主收到主辦方稱「10月1日要配合國慶人流管制措施，講到明檔主可以留喺現場睇煙花，但唔可以營業。」在海濱藝遊坊經營台灣小吃攤檔的負責人汪先生，今早於商台節目表示好無奈，主辦方突把開放時間改為上午10時至下午4時，但簽約時「明明唔係咁講」。他指「簽約個時，原本計劃咗10.1放煙花，當晚來看煙花湊熱鬧的人根本是其中一個重要客源，現時連出來慶祝的客人都做唔到，成件事都真係好諷刺。他又指「夜市同煙花原本係perfect match，夜繽紛原意就係要夠多人，多人又話要人流管制，管制埋我哋呢邊」。
灣仔海濱藝遊坊夜市｜美食區開放時間原本為下午6時至晚上11時
翻查資料，原本海濱藝遊坊活動日期為9月27日至10月2日，當中美食區時間為下午6時至晚上11時，而於官網則顯示「10月1日國慶特別安排 : 場館開放及美食區時間上午10點至下午4點」。而另外亦有檔主於節目中表示上周才得悉10.1無夜市。
網民：笑L死人，成件事到底想點
不少港人聽到此消息後都表示「真係O晒咀」，稱「如果你預咗當晚係多人出街，你個活動原意又係要多人先帶動到，呢個時候話取消夜市，原本想去望吓個Mood都無啦，到底佢哋個腦諗緊咩」、「人流管制就唔好搞夜市啦，一陣大家真係聽你講湧晒去夜市幫襯，點知太多人你又趕人走，咁係想人去定唔去」、「佢哋D部門究竟傾掂數未㗎，唔好吓吓都要超哥出聲『調停』先做嘢喎，咁搞法佢一個打十個，請你班人做乜」、「媽啊！好亂呀，等同搞花市但又唔畀賣嘢有咩分別，我真係睇唔明」、「真係笑L死人，諗住睇煙花，有個夜市趁下墟，點知又無，D檔主真係白交租，有邊個要朝早10點出門口去『夜市』食嘢，成個晏晝熱死，都唔會同你焗喺嗰度啦」、「真係好想知D檔主有幾多收入，下次搵鬼搞」。
