大圍圍方保安叫電單車男躝出去 不滿被響咹4個保安圍住鬧 網民：罷去！
保安公司稱2人已被終止合約 網流傳已轉新商場上班
而涉事保安隸屬的保安公司——城市護衞公司亦向傳媒作出回應，指公司得悉此事時，已經即時暫停2名相關保安員在圍方所有職務，其後更於11月6日終止2人的僱傭合約，並且向該被叫「躝啦」的電單車男士致歉。不過，到今日（8日），Facebook群組「全港物業管理業、保安員、警衛吹水炒散區」即有未經證實的消息傳出，指涉事的「躝爬保安」已經轉投另一間保安公司，並將會於葵芳上班。
傳聞未經證實，一眾網民已有激動反應，指「由圍方去葵芳，佢真係情有獨鍾呢個字」、「唔係掛，個商場無理由會請㗎喎，係就真係畀相嚟，我都想去會一會佢」、「躝咗2日由大圍躝去葵芳，都算躝得幾快」、「係咪專登請佢過去做景點」。消息未被證實前，網民已到商場Facebook專頁留言洗版，望商場回應事件。
商場回應事件：實屬流言
商場於網上流傳消息廣傳後，旋即回應事件，指「網上謠傳實屬流言」。
電單車男原為外賣送貨員 《東張》訪問親回應事件
昨晚《東張西望》亦到大圍圍方了解事件，恰巧撞到片中被鬧男士的同事，對方指「好過份，我哋攞貨呢條路係必經，可能新開比較忙，溝通不足，個外賣員其實我同事，一向都好客氣」。而透過男受訪者，節目組聯絡到當事人Gary了解，對方指「不嬲都惡劣，做咗幾十年人未試過咁嬲，覺得好悔辱。著西裝嗰個人係應該嚟調停件事，唔係搞大件事，我希望2個人書面向我道歉會好D囉」。
而港鐵回覆傳媒查詢時指，已暫停2名相關職員的職務，並作出適切跟進，加強相關培訓。不過網民依然唔收貨，指「而家D保安真係惡過狗」、「港鐵旗下好多商場D保安態度都係極惡劣，唔止呢次大圍，我喺西九圓方都親身經歷過佢哋d惡霸態度，狗眼看人低，見到身光頸靚，講普通話或者西方人士就禮貌多多，見到普通冇咁光鮮嘅香港人就睜大對狗眼」、「圓方，我都有領教過，我都係喺鋪頭外邊搞少少嘢，跟住冇幾耐保安即刻衝過嚟，不懷好意，又問我有冇批文，心諗，做賊咩？」
大圍圍方保安不滿電單車響咹 發惡兇對方：你躝啦
事緣有電單車車主放一道影片上網，並於YouTube Channel「車CAM特警」瘋傳，片中可見一名駕著電單車的男士駛至商場停車場入口時，因見到一名白衫保安正在行車道上慢行，因而響咹提醒對方有車到，惟對方反應極大，即時質問電單車車主：「你搵我啊？你呠乜嘢，我做緊嘢行邊度都得」，此時電單車男士表示相當無奈「吓？你行馬路中心我唔呠你咩」，對方即指「你咁鍾意咪泊出面囉，你呠我做咩先，你係咪撞我啊」。
而影片可見，接下來有數名身穿黑西裝的保安趕至，其中一名戴眼鏡的男保安起初仍笑笑口問發生什麼事，電單車男即解釋指「你行人行返上行人路嘛」，一名脫下口罩的保安即指「我哋管理公司有責任管理出入呀嘛」，電單車男則指「咁你行人行返行人路呀嘛，我好心提醒佢有車，我入嚟攞嘢，佢又喺度慢慢行阻住我，我緊係呠佢，廢事我撞到佢呀嘛，啱唔啱啊」。
眼鏡男保安：叫你躝呀，即係爬出去
此時戴眼鏡的男保安開始不不耐煩，指「咁我同事對你做咗D咩？」，電單車男再重覆，指「我係提醒個人，佢停低行埋嚟我車度，我咪停低，佢問我做咩呠佢，佢喺度邊度都行得，我驚撞到你啫，喂，發生咩事，的有做錯嘢咩？」，男保安即聲大夾惡，大聲咆哮，指「咁你而家想點？我而家問你一樣嘢，你係咪想報警，你報啦，唔係就同我躝啦，你喺度搞事啊？」
電單車男聽罷，即反問：「躝乜嘢先，我嚟拎嘢」，男保安再鬧：「你而家就真係阻住後面啦，躝啦，叫你躝呀，即係爬出去，唔識躝就爬啦，你而家搞事我就同你搞事」。
網民：我以為入咗圍村啊，以後圍方不了
網民看到影片後全場嬲爆，指「痴L線，成班保安狂躁咁」、「投訴到佢連保安都無得做，咁L串，一家大細仲點放心去」、「行馬路中間， 唔呠可以點？」、「好惡呀！圍方原來唔歡迎人入，要人躝入去嘅」、「老婆先話未去過圍方不如今日渣車去，好彩冇去到」、「擺明見外賣電單車就恰X人，以後唔駛去，驚畀人兇，車路原來係唔畀車行，改名做保安路啦」、「上樑不正下樑歪，根本唔會放住戶同客人在眼內，根本一啲服務業操守都無」、「以為去咗圍村畀人兇，以後圍方不了」。
網民教寫投訴信：商場唔理就以後罷去
亦有人指「呢鑊無得算數」，更寫了一封投訴書給事主寄去商場，指商場不處理即全部人罷去，指「以為係行高級路線商場，點知全部爛仔，搵鬼去」。
