外企惡HR公審求職者改面試｜遭起底反擊寸爆網民：Go to hell！

「你不如唔好搵工啦」惡HR公審求職者電郵

事件源於一名自稱任職人事部的打工仔，在Threads上載一封求職者的電郵截圖。內容顯示該求職者因已有旅行安排，希望將原定10月底的面試改期至11月初。該名HR員工對此大為不滿，公開發文揶揄：「你不如唔好搵工啦，我就唔知阿姐會點覆，不過你咁大牌，真係幾fun，仲要就你到下月，你邊位？」她更另外批評求職者連履歷上的電話號碼都填錯，稱：「已經email你，咁嘅回覆，holy。」帖文一出，其尖酸刻薄的態度及公審求職者的行為，立即引發網民猛烈抨擊，直斥其行為已嚴重侵犯求職者私隱，極度缺乏職業操守。

惡HR拒不認錯反擊「去旅行都見得工」

面對網民的圍剿，該名HR絲毫沒有收斂，反而繼續以強硬態度回擊，認為事件的重點在於求職者「有冇心」。她理直氣壯地表示：「其實呢，成件事唔係佢放唔放假嘅問題，係有冇心，OK？資料填錯，仲要人哋就佢幾時，你話你返緊工都算，去旅行時間好flexible吧」。她更進一步指，首輪面試只是網上進行，即使身在海外旅行亦能參與，反問：「買個支架唔難啩？買件恤衫唔難啩？」此番「火上加油」的言論，令網民更加憤怒，批評她毫無同理心，將個人標準強加於人。

惡HR被起底後刪Post再挑機「Go to hell la」

隨著事件不斷發酵，有網民對該名HR進行「起底」，並到其任職公司的社交平台專頁留言投訴，批評其職員洩露求職者個人資料，令外界對公司的私隱管理失去信心。在輿論壓力下，發帖者隨即刪除相關帖文，並將Threads帳戶設為私人。不過，她並未就此罷休，有網民發現其個人簡介更新了逾百字內容，疑似向網民挑釁：「唔用真身嘅都係shit，靜下啦！撳入嚟睇我你就輸咗喇，傻仔，議事論事啦，茶言茶語的『綠茶』，滾出Threads啦，冇文化冇logic嘅呢，我睇唔過眼就會block，go to hell la」。此舉再次激起眾怒，網民對其囂張態度感到震驚。

網民洗版狠批「冇品」公司急發聲明調查

該名HR的連串行為引發網民一面倒的負評，在其公司社交平台洗版留言，狠批其行為離譜。網民紛紛留言：「你咁樣cap人哋段email上嚟，佢見到嘅話等投訴你」、「嘩呢啲公司原來咁處理啲敏感資料㗎，仲放心同佢做生意？」、「面試撞正去旅行，話同你改期都要畀你公審？想點？」、「公開私隱唔道歉，仲挑機網民，呢啲HR點請？」。面對雪片般的投訴，涉事公司回應網民留言時，強調高度重視個人資料私隱，並已就事件展開全面調查。而私隱專員公署亦證實已接獲一宗相關投訴，將會按既定程序跟進。