港鐵首設「虛擬車站」提前測試 古洞站完成逾90項驗證結果係⋯

傳統做法機電團隊每日得兩小時測試

過去港鐵起新站一直沿用「先土木、後機電」模式，即車站結構起好晒先輪到機電團隊入場安裝同測試。更令人頭痕嘅係，機電測試受制於每日僅約兩小時嘅維修時段，工程進度被迫「龜速」推進。港鐵為咗突破呢個樽頸位，特別設立「機電系統整合測試中心」，中心內建有約20個車站核心組件，包括廣播系統、出入閘機、升降機及扶手電梯等，組成一個完整「虛擬車站」，分別模擬大堂、月台及控制室運作。團隊可以喺中心內不受時間限制地反覆測試，提前解決各系統之間嘅磨合問題。

網民關注古洞站東涌綫延綫最新進度

事件曝光後，唔少關心交通基建嘅網民都相當關注實際成效。港鐵總經理梁志添透露，一般車站約6成整合測試可以提前喺中心完成，其餘4成涉及現場環境因素，例如列車到站位置、幕門同車門是否同步等，必須返到車站先可以測試。古洞站去年已花4個月喺中心完成逾90項測試，目前已進入站內安裝階段，預計明年竣工。至於東涌綫延綫方面，東涌東站及東涌西站正進行為期6個月嘅整合測試，預計未來半年內完成。

未來超過100個機電系統將採用新模式測試

港鐵預期日後會有超過100個機電系統喺中心進行測試，新模式除咗有效提升工程質素，仲可以令營運人員提早熟習系統運作細節，為日後車站交付做好準備。換言之，呢個「虛擬車站」唔單止慳時間，仲可以減少新站通車初期出現甩漏嘅機會，對日日搭港鐵返工放工嘅打工仔嚟講，絕對係好消息。