港女淘寶買腳架收到300部爛iPhone 客服一句話令網民細思極恐

網購腳架收到一大箱舊iPhone客服反應令人玩味

事主日前在淘寶購買一支攝影腳架，選用集運服務寄返香港，點知收貨時發現貨物完全唔對辦。打開大紙箱後，入面密密麻麻堆滿數以百計舊款iPhone，每八至十部用橡筋紮成一疊，部分機背貼有QR Code及編號貼紙，目測全部係二手損壞機。事主即時聯絡淘寶客服跟進，客服初時都感到錯愕，反覆確認貨物係咪佢哋發出，當事主確認後，客服竟然拋出一句：「這一箱手機殼比這個架子值錢多了」，令事主徹底崩潰，直言自己只係想要返支腳架。

網民群起追問手機來歷警告事主切勿私下處理

事件曝光後，大批網民替事主擔心，討論迅速兩極化。一批網民笑稱事主「因禍得福」，獻計叫佢拎去觀塘鴻圖道或者深水埗鴨寮街放售套現，甚至計過數話”拆散修理砌返埋變100部完整，每部賣1000都有10萬”。不過更多謹慎派網民即時潑冷水，指出呢批來歷不明嘅舊手機極有可能係走私「老鼠貨」甚至賊贓，有人更加將事件同東南亞詐騙集團聯想埋一齊，驚呼”有冇可能係KK園嘅人”、”唔通係倫敦搶返嚟嘅電話”，強烈建議事主千祈唔好私下處理，應該盡快報警交由警方跟進，以免負上接贓物罪嘅刑責。

事主向平台正式投訴後成功獲退款項

面對網民鋪天蓋地嘅建議同警告，事主最終選擇向淘寶平台提出正式投訴，要求退回購買腳架嘅款項。經過平台介入處理後，事主成功獲得全額退款。不過，令一眾網民最掛心嘅問題——呢300部神秘iPhone到底點處理、最終去向如何，至今仍然未有交代，大批網民紛紛「留名等後續」，事件懸念未解。