峇里島度假村驚天盜竊！4遊客退房被當場搜篋 結局竟然係…
廣告
去旅行住酒店，房內嘅嘢唔係樣樣都可以拎走㗎！最近印尼峇里島就發生一單極度誇張嘅遊客貪小便宜事件，有4名遊客喺退房時，竟然將房內大量物品，由風筒到浴袍，甚至連門墊都唔放過，全部塞入自己行李箱企圖「順手牽羊」，結果被酒店職員當場斷正，搜篋過程更被全程拍低放上網，引發全球網民熱議！
4名印度遊客退房順手牽羊斷正
事件發生喺上周日（19日）早上約10點，地點係峇里島烏布一間高級度假村。涉事嘅4名印度遊客結束三日兩夜嘅行程後準備退房，點知職員喺例行檢查客房時，赫然發現房內有多項物品不翼而飛！管理層隨即要求暫停為佢哋辦理退房手續。職員其後當住遊客面前打開佢哋嘅行李箱，結果令人震驚，所有失物竟然已經被全數打包，塞滿晒幾個行李箱！據報，呢批遊客企圖掠走嘅財物種類繁多，當中包括浴巾、泳池毛巾、風筒、和式浴袍、門墊、電視遙控器盒，甚至連房內嘅餐具都無一倖免，實在令人咋舌！
搜篋影片瘋傳網民鬧爆行為極度失禮
事件曝光後，最令人關注嘅係成個搜篋過程被拍成影片並喺網上瘋傳，大批網民替酒店不值，更群起洗版鬧爆該批遊客嘅行為。影片中清楚可見，酒店職員逐一由行李箱內拎出屬於酒店嘅物品，而涉事遊客就喺旁邊一臉尷尬。網民紛紛狂轟佢哋嘅行為極度失禮，「貪心到咁真係好離譜」、「影衰晒自己國家嘅形象」、「以為無人知，點知搞到全世界都知」。
酒店選擇息事寧人遊客最終全身而退
雖然人贓並獲，證據確鑿到遊客嘅行為已構成盜竊，但度假村最終竟然選擇息事寧人，並未有向警方報案。據當地警方發言人證實，雙方同意透過調解方式解決，喺該批印度遊客全數交還所有財物後，事件就和平解決，酒店亦容許佢哋完成退房手續離開。雖然佢哋成功避過法律責任，但當眾被搜篋嘅尷尬一幕已經成為網絡熱話，呢份「手信」真係畢生難忘！
