6旬婦無痛感身體突發黃 1個月暴瘦5KG求醫揭恐怖真相

6旬婦無故暴瘦5KG求醫揭驚人惡疾

台灣胰臟科醫生林相宏分享個案，指該名60歲事主大呻一個月前開始胃口不佳，食少少嘢就飽，小便顏色更變成紅茶一樣深色。最令人心寒嘅係，事主完全無任何痛感，但體重卻在一個月內急降5公斤。直到後來連眼白同皮膚都開始發黃，屋企人察覺唔對路，催促佢去醫院檢查，結果一驗之下，黃疸同肝指數竟然比正常高出超過10倍！再經超聲波同電腦掃描，證實胰臟頭部有一個達4cm嘅巨大腫瘤，確診患上「魔王級」胰臟癌，目前外科醫生仍在評估能否進行手術切除，情況不容樂觀。

醫生警告7成患者無症狀網民極度恐慌

事件曝光後，大批網民對此「無痛癌症」感到極度恐慌。林醫生警告，胰臟癌素有「沉默殺手」之稱，因為高達70%嘅患者早期都係無任何症狀，或者只有輕微消化不良，所以極難發現。佢解釋，由於膽管就在胰臟頭部旁邊，一旦腫瘤生長在該位置，就好容易壓迫到膽管，導致膽汁無法正常排出而引發黃疸. 一般嚟講，腫瘤越大，出現黃疸嘅機會就越高，而事主正正就係典型例子。

醫生親授3招自查黃疸高危人士要留神

想及早發現身體警號，林醫生亦親授3招簡單自查方法。第一，觀察排泄物，如果小便顏色持續呈紅茶深色，而糞便變淡呈灰白色，就要加倍小心。第二，檢查眼白，在自然光下將下眼皮拉低，正常應為白色，若變成淡黃甚至深黃色，就係黃疸嘅明顯跡象。第三，觀察皮膚，不過當全身皮膚都變黃時，情況通常已經相當嚴重。根據本港資料，胰臟癌係香港第4號致命癌症，而吸煙、飲酒、肥胖及有家族病史嘅人士均屬高危，絕對不能掉以輕心！