過大海玩水～澳門天浪淘園最抵玩法 | 6大酒店泳池 Battle

May 10 2017

天氣濕熱又翳焗，是時候換上泳衣小褲子，跳進冰涼沙灘泳池享受炎炎夏日！澳門酒店越開越多，過大海的新意義就係去酒店玩水！究竟邊間酒店泳池最啱今年去進行下水禮？邊間適合帶埋小朋友去放暑假？怎樣買票才可以最抵價進入澳門天浪淘園？以下嚴選6大星級澳門酒店泳池，為你的夏日大作戰做好準備！

01 | 最抵價暢玩澳門天浪淘園
抵玩：★★★★☆｜設施：★★★★★｜刺激：★★★★★

澳門最大型的水上遊樂設施，非澳門銀河度假村的天浪淘園莫屬，水上樂園入場費要$468，2人平少少要$888，幾乎是1晚酒店房價！以往要用最便宜方法入園，不少人都建議住百老匯酒店，不過政策有變，百老匯的基本住宿不再包括使用天浪淘園，要買包埋奇幻秀等表演的套票才可；假如只想要酒店加天浪淘園，今年最抵玩的是銀河酒店，入住21日前預訂有8折優惠，最平由$958起，不過唔包早餐。天浪淘園最好玩當然係500米長激流同沖浪池，朝9晚6玩足全日，園內又有更衣室設備，住1晚玩埋樂園最抵！

天浪淘園的激流全長575米，漂一圈約半個鐘，浸足全日不覺悶。 — 天浪淘園的激流全長575米，漂1圈約半個鐘，浸足全日不覺悶。

$958起澳門銀河酒店
房價*：周日至四$958起，周五$1,518起，周六$1,998起
天浪淘園全日通：每位$468，2人$888
備註：以上*為21日前8折早訂優惠
網址：www.galaxymacau.com

02｜即日來回或過夜浸玩水世界
抵玩：★★★★☆｜設施：★★★★☆｜刺激：★★★★★

去年開幕的巴黎人的玩水設施：水世界，無論住客和非住客都要付費入場，以海盜為主題，當中設有巨型海盜船和兩條水上滑梯，船上有水槍、吊籃、水上管道、爬網、搖擺木橋和兩條高3.3米的滑梯，啱晒小朋友玩水，仲有巨型瀑布傾瀉效果。另一重點是高12米的旋轉滑梯，滑落速度超快，離心力強，勁過癮！住客還可免費使用水世界另一邊的泳池，泳池夠大又多沙灘椅，還有座紅磨坊做背景。

$888起澳門巴黎人
房價*：周日至四$888起，周五$1,088起，周六$1,488起
水世界入場費：$160（4人家庭有買3送1優惠，即每人$120）
備註：以上*為期間特賣，優惠至5月19日止；入住日期由即日至年底
網址：hk.parisianmacao.com

03｜Hea住浮游亞馬遜
抵玩：★★★★☆｜設施：★★★★★｜刺激：★★★★☆

新濠影滙除咗8字摩天輪，3樓戶外泳池可以玩漂流河「綠野遊蹤」！雖然速度和長度都比銀河的遜色，15分鐘就玩完，但員工話漂浮河又叫「lazy river」，俾人hea爆浮住曬太陽，漂住睇巨口鱷魚和亞馬遜古廟都幾得意。場内仲有3條小兒科滑水道，由巨石口滑出，小朋友實鍾意。設施免費開放俾住客玩，非住客入場要$330，不少本地客都鬧超貴冇得玩。

$1,098起新濠影滙
房價：周一至四$1,098起，周五$1,398起，周六$2,098起
「綠野遊蹤」入場費：住客免費，非住客$330
備註：套票包2人自助早餐、$100消費券
網址：www.studiocity-macau.com

04｜服務貼心包飲品、防曬
抵玩：★★★☆☆｜設施：★★★★★｜刺激：★★★☆☆

去年新開幕的永利皇宮，除了大量花卉佈置，連室外露天泳池也延伸這設計風格，貴氣十足充滿驚喜。雖然永利的吊車會在泳池上方橫過，但泳池的景觀算是開揚，休憩位置相當充足，住客會有免費飲品提供，泳池更衣室還有提供防曬用品，這太貼心了吧！另外劃分出來的按摩池佔地不小，不用與其他住客人迫人。

$1,341起永利皇宮
房價*：$1,341起
備註：以上*為30日前75折早訂優惠
網址：www.wynnpalace.com

05｜無敵靚景Infinity Pool
抵玩：★★★☆☆｜設施：★★★★☆｜刺激：★★★☆☆

路氹的美獅美高梅下半年先開，但靚泳池唔係新酒店專利。澳門半島的MGM，前望南灣可遠眺氹仔，左邊是觀音像和科學館，不過右邊是隔籬酒店主樓，但景觀開揚，泳池旁又有大片空地，是pool party場地，呈U字形泳池夠晒闊落。另外，泳池旁有池畔吧，點杯cocktail或奶昔不過$40多，旁邊有成廿多張沙灘椅，在澳門這個彈丸之地有這樣的infinity pool，夫復何求？