獲派40年朗屏邨應否接受｜網民曝光真實環境 揭舊公屋3大優勢勝新樓
40年朗屏邨保養良好 樓主籲勿秒拒舊邨
樓主在facebook群組「公屋討論區-香港facebook群組」發帖，分享娘家獲派的朗屏邨實況。從照片可見，雖然大廈走廊牆身和地面帶有年代感，升降機亦出現鏽跡，但整體環境乾淨企理，空間相當闊落。樓主特別強調「公共地方仲keep到幾靚仔」，提醒其他輪候人士「派到舊邨最好親身去睇下」，不必因為是舊公屋就馬上拒絕編配，建議實地視察屋邨各方面情況後再作決定。
網民力撐舊公屋三大優勢勝新樓
帖文發出後獲得大量網民認同，不少人認為舊公屋擁有新樓無法比擬的三大優勢。首先是鄰里關係方面，有網民表示「舊屋邨鄰里關係一般較好」、「我都鍾意住舊屋邨，大家街坊好好」、「舊邨有人情味多啲，鄰居都好緊要」。其次是間隔實用性，網民指出「夠大好用，裝修好，外邊點舊話之佢啦」、「舊樓先至好，實用面積又大」、「舊啲位反而好用，仲平租啲」。第三是配套成熟度，有人提到「朗屏而家有西鐵，其實方便啦」，認為舊邨經過多年發展，周邊設施已相當完善。
輪候人士應實地考察 避免未睇先拒絕
多名網民支持樓主建議，認為輪候人士獲編配舊樓時不應「秒拒」。有網民分享經驗指「未睇就判刑，唔值得呀，反正都係咪就上去望下先，自己睇好過人哋話，我都係自己去睇過先決定要唔要」。不過亦有人提醒要視乎具體屋邨而定，「朗屏交通方便有得要點會唔要」，但同時質疑「試下畀啲交通唔方便嘅超級舊邨睇你要唔要」，強調「其實舊邨係case by case，唔係一刀切」。
好鄰居比新舊樓更重要 管理質素成關鍵
討論中有網民提出，除了新樓舊樓之別，遇到好鄰居更為重要。部分曾入住新公屋的網民分享遇到惡鄰的經歷，提及噪音問題嚴重，甚至要張貼通告提醒。有人抱怨「我見過佢哋（鄰居）係用個無蓋嘅水桶裝住啲垃圾行一段距離再直接倒落公家大垃圾桶內，唔會話用個垃圾膠袋綁好先掉」，亦有網民表示「其實好睇間管理公司做得好唔好，同埋附近嘅鄰居，派新樓但遇著啲成日敲嘢嘅鄰居，都住得唔開心」。更有人形容新型公屋「全部都好似監倉式，出邊又唔可以擺嘢，靜英英，毫無生氣」，認為缺乏生活氣息。
