9大收納小貼士！衣物換季有計 2秒摺衫法、自製防滑衣架、改造鞋盒｜好生活百科

收納小貼士1
2秒省時摺衫技巧

有冇親身試過用呢個極速方法摺衫？首先，將衣服放平攤好，右手拿著衫頂、近衣袖的位置（圖：位置A），左隻手放在同一邊、衣服中心的位置（圖：位置B）。然後右手向下拉，像對摺般拉到衫的底部（圖：位置C），拿著衫頂和衫尾。之後左手向外拉，拉出來後拿起衣服，再摺一摺便完成！幫你慳返好多時間！

影片教學：

收納小貼士2
File小幫手 拎衫唔會亂

一般人習慣將衣服一件件疊起，雖然好整齊，但從中間抽出衣物，或者搵衫嘅時候，就會令整齊嘅衫變亂七八糟。可以用紙皮箱同幾個file DIY一個衣物收納盒，將紙皮箱兩旁打洞，file亦在相同位置打洞，將file放入紙皮箱，然後用繩將紙皮箱及file穿起便完成。

只要將摺好的衣服放入file與file之間，你再從中間抽出衣物，再唔會變得凌亂！

影片教學：

收納小貼士3
慳位直立式收納法

如果覺得整衣物收納盒好麻煩，可以改改放衫嘅習慣，用直立式收納，將衣物品摺好後打直放，再排列整齊。方便拎衫之餘，仲可以慢慢揀衫添！

收納小貼士4
1個衣架變2個！

平時飲完汽水後，可以將拉環留起循環再用！拉環可以將2個衣架扣住，同一時間可以掛兩件衫，換季買新衫都唔怕冇地方掛啦！

收納小貼士5
自製防滑衣架

女士們有唔少吊帶衫，如果用衣架掛起，吊帶衫會經常滑落好麻煩，又唔想買防滑衣架，宜家有辦法！只要將兩條橡筋扣在兩邊衣架，便可以阻止吊帶衫再滑落嚟喇！想再環保d，可以剪掉舊絲襪綁住衣架兩旁，掛好衣服後，將絲襪圈到衣架勾，亦有防滑落功能！

收納小貼士6
放帽子手袋妙法

帽子成日放埋一堆，好易令到帽子變形，真係好心痛！不妨試試於衣櫃加伸縮桿及掛勾，可以掛起你常用的帽，方便拎之餘仲可以慳返d位添！呢個方法亦都可以用嚟掛手袋。

收納小貼士7
1個衣架掛哂全部頸巾

收納頸巾都好講求技巧，將頸巾綁在衣架上，一個衣架起碼可以掛4、5條頸巾，方便你揀同拎，仲好整齊添！

收納小貼士8
1個鞋盒輕鬆放2對鞋

覺得鞋盒好浪費空間？原來只要將佢做少少改變，令你拎鞋都方便d！將鞋盒斜切一半，將1對鞋放盒內，再將盒蓋蓋好，便可放第2對鞋上去，便可以做到此效果！

收納小貼士9
自製整齊電線盒

屋企有好多唔同長短的電線，一堆放埋一齊，想拎果陣又打哂結，原來用鞋盒同廁紙筒就可以將電線收納好！將較短的電線放入廁紙筒，然後將廁紙筒放入鞋盒，最後將長電線放入紙巾盒剩餘的空間，電線就唔會打結，好整齊！冇鞋盒的話，用紙巾盒都同樣做到呢個效果。