海洋公園 哈囉喂 2015 真係有10間鬼屋?

香港好去處

廣告

海洋公園 哈囉喂 15周年,聽講話係歷年嚟最驚嚇,所以今日記者就化身試玩敢死隊,冒住被嚇嘅風險,帶大家睇吓其中6間鬼屋到底有幾驚!

15年驚異回魂

首先帶大家睇嘅係呢間集過去14年精華於一身嘅15年驚異回魂,講到明係sell回憶sell經典,入到去又真係冇失望。2009年嘅13號差館、2010年嘅旋轉木馬、2012年嘅冥婚,全部都會重新呈現眼前,粉絲們唔好錯過!

驚嚇度 ★★★★☆
值得排隊指數 ★★★★☆

新嘢!生化突變大暴走(日)

今年 哈囉喂 首度引入充氣障礙賽道,聽落幾新鮮,不過見到實物嘅時候,感覺就好似去咗遊樂場咁,竟然係一個戶外嘅遊樂設施,而且因為安全問題,現場嘅嘩鬼演員都唔會追住你,以免大家整親喎。想像吓,日光日白而且只有一隻鬼,真係唔多似鬼屋,冇鬼又冇屋。不過咁,如果純粹想玩吓笑吓,都真係幾好玩,而且仲幾花體力添!

驚嚇度 ★☆☆☆☆
值得排隊指數 ★★☆☆☆

異種突襲大屠亡(夜)

頭先講過,基於安全理由,充氣障礙賽道入面嘅嘩鬼係唔會追住大家嘅,不過夜晚總算多咗幾隻鬼,失驚無神彈出嚟都有d驚,而且充氣賽道唔容易企穩,嚇一嚇就更加易跌低。本來諗住日夜差距唔會太大,點知就係因為多咗幾隻鬼,成件事即刻好玩咗同驚咗!

驚嚇度 ★★☆☆☆
值得排隊指數 ★★★☆☆

甜心蘿莉大宅 (日)

今年繼續有日夜鬼屋大變身,日頭嘅時候,大宅入面嘅蘿莉會化妝扮靚畀大家影相,有興趣不妨一同變身lolita入去battle!另外,今年破天荒可以喺鬼屋入面影相,甜心蘿莉會拎住手機同大家玩自拍,相片可以喺ASUS Facebook下載返,仲有機會贏手機添!不過講到明可以影相,入面真係燈火通明,而且嘩鬼都係行可愛路線,笑臉迎人,嚴格嚟講都唔算係「鬼」屋,想畀人嚇嘅話就會有d失望喇。

驚嚇度 ★☆☆☆☆
值得排隊指數 ★★★☆☆

血咒哥特古宅(夜)

一眾美少女日頭玩完一輪selfie,夜晚就即刻轉身變成邪惡蘿莉,隨時嚇你一跳。雖然變妝成血腥蘿莉,大宅燈光亦變得昏暗,但係驚嚇度只係一般,記者反而係畀屋內機關嚇親,真係有d驚!

驚嚇度 ★★★☆☆
值得排隊指數 ★★★☆☆

小南瓜糖果遊

自從海洋公園 哈囉喂 實行全日祭之後,就開始行可愛路線迎合不同人,所以都預咗呢間鬼屋唔係行驚嚇路線。但係去到,見到原來並唔係一間鬼屋,而係一堆戶外攤位遊戲,有南瓜姐姐同大家合照兼送小禮物,似兒童王國多過似鬼屋。

驚嚇度 ☆☆☆☆☆
值得排隊指數 ☆☆☆☆☆

記者作為海洋公園 哈囉喂 嘅粉絲,今次試玩呢6間鬼屋的確有少少失望,因為多數都唔太驚,唯一符合預期嘅只有15年驚異回魂。不過如果你係「被嚇初哥」,都應該可以滿足到你。下星期會再同大家直擊其餘4間鬼屋,希望H15同埋同The Walking Dead合作嘅逃出陰屍路會驚d啦!

海洋公園 哈囉喂 全日祭2015

日期:2015年10月2日-11月1日(其中18個特選日子)
時間:10am-11pm(周末及公眾假期)10:30am-11pm(平日)
普通票價:成人$345;小童(3-11歲)$173