你睇！多啦A夢嚟喇！35周年經典回顧！

Jul 28 2015

又嚟到一年一度睇叮噹，丫唔係，係睇多啦A夢劇場版電影嘅時候喇！話咁快就嚟到第35年，今個暑假，《大雄之宇宙英雄記》中嘅「銀河防衛隊隊長」多啦A夢將與「漢堡包導演」現身Mikiki、屯門卓爾廣場、屯門錦薈坊及荃錦中心，出席「多啦A夢電影35周年回顧展」，同粉絲們見面。

其中，Mikiki呢個展區最大，不過都屬於一眼睇晒嘅size，入面分別展出多啦A夢電影系列35年來嘅經典海報、手稿、限量精品及紀念特刊。

從「人人期望可達到」唱到「猶如在夢幻國」，由「叮噹」變成「多啦A夢」，轉眼已經35年，當年嘅小朋友如今已經長大成人，而伴隨港人成長嘅多啦A夢聲線亦成絕響，不過，都不減我哋對多啦A夢嘅熱愛。趁住呢個機會，可以回顧過去35年來，陪伴大家成長的好朋友。

7至8月期間，多啦A夢真人大公仔亦會現身呢四個商場，同粉絲們見面。

另外，由即日起至8月16日期間，逢星期六、日喺以上4個商場以電子貨幣消費滿港幣$800（最多兩張即日機印發票），即可換領電影多啦A夢《大雄之宇宙英雄記》電影換票証一張。又或者由本周末起，於Mikiki Facebook專頁回答一條有關問題，答案最好嘅20名得獎者亦可獲贈電影換票証2張。

除咗Mikiki之外，屯門卓爾廣場、屯門錦薈坊同荃錦中心都會有其他多啦A夢35周年場景，包括「探訪波古路星」、「宇宙探險之旅」同埋「勇闖銀河宇宙」。