甜品
甜品

相機食先!法國L’Éclair de Genie吸睛甜品殺入香港

飲食

廣告

當人人都放蛋黃哥上網呃like之時,走在潮流尖端的你、你、你又點可以唔行多幾步,發掘其他新奇美食!今次唔食點心,改為品嚐來自法國大師的L’Éclair de Genie精緻 甜品 ,顏色鮮艷奪目的閃電泡芙,配上小巧玲瓏的朱古力,一樣可以吸引世人目光。L’Éclair de Genie首間專賣店位於巴黎潮人地帶瑪黑區 (Le Marais) ,如果曾經去過本店朝聖,唔難發現門外長長的人龍幾乎全是本地人,就連對甜品要求咁高的法國人都慕名排隊,可想而知今次呢條過江龍有幾勁!

L’Éclair de Genie主打閃電泡芙,意思是泡芙非常美味,只要拎上手,就會以閃電般的速度食完!泡芙呈長條狀,每款口味都有獨特的精緻造型,單是繽紛的外觀已經成功令「相機食先」的香港人為之瘋狂,左影右影都咁靚。
鹹牛油焦糖泡芙是熱賣款式之一,以幼滑的馬斯卡邦奶油配鹹牛油焦糖,味蕾被兩種截然不同的滋味同時衝擊。香草合桃果仁泡芙亦相當受歡迎,先用馬達加斯加香草奶油作基礎,再放上塗滿焦糖的合桃果仁,香口又甜蜜。

除了閃電泡芙,L’Éclair de Genie的朱古力套裝都非常特別,以錫紙管包裝焦糖,方便整枝用熱水座熔。套裝另外搭配焦糖榛子、朱古力磚與朱古力塊,可以根據自己口味選擇不同系列,送禮自用都無問題。

想食糖兼食朱古力?他們的朱古力糖果可以一次滿足兩個願望!以香濃可可豆製成的朱古力包裹各款焦糖,每粒先試到滑溜朱古力,之後糖味慢慢透出,味道層次豐富,25粒裝都未必夠食啦!

想殺入香港市場,又點會只得泡芙和朱古力!第三樣武器是香港限定的總匯三文治,以不同的天然材料炮製彩色麵包,內餡多到難以一口咬盡,未食已經要瘋狂影相。

L’Éclair de Genie

金鐘太古廣場第一分店
開店日期:2015年11月25日

中環太子大廈第二分店
開店日期:2015年12月1日

延伸閱讀:【掃街王】香滑惹味鰻魚蛋包飯+靚到發光沙冰 熱爆粉嶺工廈

【掃街王】先食卜卜蜆火鍋+再食回憶 Viennetta 雪糕!澳門5大美食

香港18區美食有甚麼推介?

新假期編輯已經為你整合了香港18區美食指,其中包括尖沙咀、旺角、銅鑼灣等……即睇更多詳情。

香港有甚麼週末好去處推介?

香港18區都非常值得花時間好好探索,一家大細去暢玩的親子好去處、拍拖推介32大情侶好去處、落雨必去的室內好去處、慶生推薦20大生日好去處、新手必備19大靚景行山好去處、秋天戶外露營好去處…..