【自助餐放蛇起底組】$118雞煲火鍋 屯門放題新場

一坐低，店員就同我哋講限時2小時，可以揀 雞煲 或醉 雞煲 ，出面有熟食及飲品自助區域，火鍋可以劃紙仔落單，最重要的是量力而為，珍惜食物！

火鍋、飲品選擇大路

望下張火鍋紙先！配料選擇都大路，美國肥牛、生蝦、豬皮、墨魚滑、丸類、芝士腸、菜等都一應俱全。而農場雞、燒蠔，入場價只係包1人1隻，想要額外添食的話就要再俾錢。好傷心，原來燒蠔唔可以任食！

飲品可以自己出去拎，有汽水、啤酒、涼茶及樽裝水。

未食 雞煲 先送燒茄子+燒蠔

我哋拎完飲品返位時，有碟燒茄子在我們枱上！問了店員，原來是送的！每人1件，好驚喜喎!

茄子都未食完，又送多碟燒蠔！都係每人1件，蠔上面啲油重滾熱辣。而且都落足料有好多蒜蓉，未食已經聞到好香。先試第1隻，入面有2小粒蠔，原來已經預先幫你將隻蠔切離蠔殼，吓？蠔殼會唔會重用嫁……

試味時間，第1粒蠔好細粒，肉質好薄，但燒完之後都幾惹味。第2粒蠔雖然大隻小小，但肉質好韌!

再試第2隻蠔，這隻入面有原粒大大隻的蠔，肉質明顯比上一隻飽滿，一咬落去蠔汁標晒出來，好肥美而且無腥味，小心辣親啊!乜同上一隻咁大分別，質素咁參差嘅？

濃味雞煲 可惜雞件不夠滑

等了十分鐘， 雞煲上枱！2人份量有半隻雞，望落去雞件都幾大件，幾有肉哋，而且份量都OK，兩個人食都夠分！不過…味道方面就有少少失望，食落雞肉都幾入味，肉質都彈牙，但略嫌雞肉唔夠嫩滑！

自助區域有咩食?

火鍋配料除了劃紙仔，原來都可以出去自助區拎，自助區都有丸類、菜、響鈴，重有劃紙仔上面無的炸魚皮！不過肥牛、滑牛肉、墨魚滑等比較搶手的食物就要劃紙仔了!

熟食區食物都清得七七八八，有好多空碟但都未有人refill，最想食的乳鴿早已被人搶晒，要金晴火眼望住個熟食區幾時refill!

平日都爆場 人手不足

返埋位劃紙仔，不過原來要成功落紙都幾艱難！樓面得２個人，雖然他們都好勤力喺個場到周圍穿梭，但喺我叫咗幾次佢哋都聽唔到，小記更要行出去收銀將紙仔比店員，但佢哋好好禮貌，有同我講唔好意思，算數啦！

落紙點了肥牛、滑牛肉、墨魚滑及響鈴，前三樣嚟齊，但響鈴仍然無跡影。好不容易見到店員refill，立即衝出去夾，但都好受歡迎，瞬間俾人清了半盒，想食就要不時留意住啦！

矜貴乳鴿 手快有手慢無

終於有乳鴿啦！9秒9衝出去，但都已經俾人夾咗好多，到我夾時都只得3件，出爐1分鐘就已經夾清光，超快！

這隻珍貴的乳鴿，外皮都幾脆，肉質好滑，富肉汁，有得食多幾隻就好了!!!

任食熱辣辣甜品

打完邊爐，估唔到重有糖水食！出面自助區域有得拎芋頭西米露及蕃薯糖水，兩碗都熱辣辣，芋頭西米露好香甜，但出面糖水櫃啲芋頭都已經無乜；蕃薯糖水一入口都甜，後勁帶少少辣，如果再落多少少薑辣返啲就perfect啦!

總結：

雖然價錢好平好吸引，火鍋食物選擇都大路，但 雞煲 的質素麻麻，而且搶手嘢例如乳鴿、熟食、響鈴等都喺手快有手慢無，一不留神就無得食，成日要望住好攰啊!如果住屯門的朋友都可以一試，但是住市區的朋友，我就唔建議你山長水遠入屯門食啦!

總分:6/10

良景鮮味 雞煲 火鍋

地址：屯門新平街2號屯門工業中心B座地舖（顯示地圖）
電話：2462 1591
營業時間：星期一至六，星期日休息
晚飯時段： 5:30pm-9pm 成人$118；小童$98
宵夜時段： 9pm-12am 成人$98；小童$68
備註：用餐時間:入座時間起計120分鐘；只收現金

延伸閱讀:
【18區掃食】三角公廁搵食 尖咀七大$100有找推介
街頭小食新登場！邪惡黑白魚蛋 【佐敦食乜好】