一網搞掂機票加簽證｜實測HK Express 30美金+15分鐘即批越南簽證
Text： Cynthia Photo： Damy Mak、Sum.travel 深導遊、相關機構
US$5 即可預先申請落地簽證
有航班飛往越南峴港、芽莊的HK Express推出了全新服務，只要在網站購買機票同時畀多US$5，即可預先申請落地簽證，之後3-4個工作天內就會收到確認信，在越南落機後，就可直接前往櫃枱辦理落地簽證，相當方便！
快證8小時內搞掂
如果趕住去越南，3-4個工作天都嫌太耐的話，可以申請快證，4-8小時就成功，費用只需US$32/HK$245。以後一搶到平機票即飛越南都冇問題喇！
步驟1：買機票
由於是次簽證是HK Express與越南Travel Mart的合作，因此一定要於HK Express網站購買越南機票，才可以享有優惠。
步驟2：申請許可證
於網站 http://vietnamquickvisa.com/?ref=hkexpress 填寫表格，包括個人資料、申請VISA的類型、選擇機場等等，申請落地簽證許可證。
步驟3：PayPal繳費或過數
完成填表後，即可選擇用PayPal或銀行轉帳付款，可惜沒有信用卡選項，普通證件為US$5，快證則要US$7。
步驟4：等待確認信
繳費後，越南移民局會於3-4個工作天（一般證）/4-8小時（快證）將許可證透過e-mail傳送，記得一定要print 出來帶上機！
步驟5：帶埋相片及表格上機
出發前，要先在網上下載落地簽證申請表格，帶備兩張證件相、確認信，以及US$25，然後就可安心上機。
步驟6：落機排隊搞簽證
一落機，就要去counter遞交passport及上述資料，職員會統一收集，等待大約15分鐘後，就會完成簽證程序，統一發還passport，咁就搞掂越南VISA喇！
Blogger實戰經驗分享
Blogger「Sum.travel 深導遊」早前試過此項服務，從網上申請，到真正落地辦妥簽證，過程十分簡單，比起以前去領使館搞又便宜又方便！
注意事項 1：美金最好帶齊頭
我帶了US$100去付錢，結果對方找回我美金加越南幣，計番我蝕咗啲錢！
「Sum.travel 深導遊」出發時只有US$100美金大鈔傍身，結果當地職員沒有找回整數的美金給她，而是找美金加越南幣，計番發現自己蝕了US$0.4，蝕咗約HK$3！！！可以的話，帶齊頭US$25，就唔使找續！
注意事項 2：最好預早兩日申請
雖然網上聲稱只需3-4個工作天就會e-mail 許可證，但「Sum.travel 深導遊」表示等咗5、6日都未有消息！最後都要send e-mail 去詢問，先收到確認信。因此，最好預早一兩個星期處理，如果有意外就好麻煩！
網友留言：等極都收唔到回覆！
有唔少網友同樣表示，申請咗之後一直等不到回覆。HK Express回覆，如果收唔到e-mail，可以e-mail/致電聯絡HK Express，會馬上幫忙處理。
