空姐
空姐

空姐加人工減黑絲?! @杜遊珍

博客

廣告

被國泰全資收歸嘅國泰港龍勞資雙方傾掂數,今年薪調幅度睇齊,空姐空少齊齊加人工4%,資方仲「大方」承諾每年半提供5對40針高質絲襪畀空姐們,工會就話仲有幾項福利未肯答實,但整體尚可接受。一眾空姐姊妹就好似未太飲得杯落,佢哋就呻,以往港龍新入職時,公司會一次過畀18對絲襪,但新措施下, 入職只派5對,之後每年半先再有5對新襪,計落數量少咗喎,估唔到公司會慳埋啲婆仔數!空姐X 大叫有苦女人知,話機上工作繁忙絲襪好易勾爛,每年最少要用半打至一打絲襪,睇怕要貼錢打工喇。唉,其實制服哀歌點止呢單,仲有華航甩色鞋、維珍紫紅妝,慘慘豬啊!

國泰港龍沿用紅黑制服,有意無意同國泰紅服Blend-in,仲繼續齊齊黑絲。

刁鑽深紫

國泰港龍2013年之前就係全深藍套裝制服,阿珍老友、陳年地勤Y回想起當年規定要著深紫藍色絲襪,咁刁鑽,點買啊?!

打孖甩色

去年華航轉新制服劣評如潮,有空姐更大鬧公司肉色絲襪都甩色,加上騎呢橡筋丁字鞋,又再甩到腳趾都變藍色。

Must-have紅唇

航空公司都會要求空姐化妝收起殘樣,維珍航空嚴到指定淺紫(或大地色)眼影襯返條scarf,仲獨家與bareMinerals合作出維珍紅色唇膏,你估人人都可以好似老闆Richard Branson演繹得咁好!