新鮮奶茶、乳酪自動販賣機?! 台灣4大排長龍販賣機
爆趣販賣機1：英式電話亭奶茶機
就咁睇以為佢係英式電話亭……擺設，但實質原來係賣進口茶葉泡製而成嘅英式奶茶嘅販賣機！位於高雄市嘅佢簡直係近排嘅人龍之冠！店家表示，由於呢款英倫奶茶每日必須經過長時間嘅「醒茶」過程，所以唔能夠大量質造，每日只限量200支！而補給員一日就會分凌晨、下午同夜晚3段時間補給，唔少市民都喺補給員嚟之前排定隊，閒閒哋都排半個鐘㗎，下次去高雄想試就記得預早少少去排隊，去到賣哂都唔緊要嘅，同呢個「表裡不如一」嘅販賣機selfie相信都呃到唔少Like！
電話TEA 英式茶飲自動販賣機專賣亭
地址：台灣高雄市新興區五福二路147－4號（新崛江站） （顯示地圖）
補給時間：3:00pm－4:00pm；8:00pm－9:00pm；12:00am－1:00am
電話TEA Facebook專頁：電話TEA 英式茶飲自動販賣機專賣亭
爆趣販賣機2：台南超人氣手搖「壽奶茶」
「壽奶茶」比起「電話TEA」更早召喚到人龍！喺上年年尾推出販賣機後，台南市就掀起一鼓排隊潮，當時有唔少市民喺老闆凌晨5點補貨前已經開始排隊，而去到朝早6點更加已經畀fans們買哂，認真架勢！「壽奶茶」主要分為黑、白蓋兩大味，分別「黑蓋」嘅全麥奶茶同「白蓋」嘅紅茶底奶茶，另外亦有限量抹茶味可供選擇。「壽奶茶」講到明要品質係宗旨，所以堅持每日新鮮煮茶3－4個鐘、醒茶2－3個鐘加製作搖奶4個鐘嘅過程，每日限量300支！店家亦由原本得1部販賣機增加多個販售點，滿足fans要求，不過大家都係限買2支㗎炸，想試呢隻比fans讚得天上有、地下無嘅手搖奶茶，都係果句：早啲去排隊啦！
壽奶茶
販賣機地址：台南市中西區西華南街28號（顯示地圖）
販賣機供應時間：每逢星期一排定公休，無奶供應，星期二至日正常售賣，直至售完。
販賣點地址：台南市東區裕豐街35號（荷糖動物食料）（顯示地圖）
販賣點販售壽奶時間：星期二到六，4:00pm開始販售，直至售完，星期日固定公休，星期日和星期一無供應壽奶。
壽奶茶Facebook專頁：壽sweet奶茶專賣
爆趣販賣機3：首部台灣乳酪販賣機！
強調無防腐劑、無色素色動物膠嘅天然台灣造乳酪「森霖優格」喺台南有間實體店之餘，亦有間網上店，但因乜解究要出埋販賣機呢？店家就話想出隻可以畀人邊行邊飲嘅「喝優格」，畀忙碌兼趕時間嘅人都可以為身體「補菌」健體！呢部販賣機仲係全台灣第一部嘅乳酪販賣機，有唔少網民都大呻：好！難！買！15分鐘就已被賣完～睇嚟有實體店嘅販賣機亦無因此而減低台灣人衝販賣機嘅心～
記者上網睇睇呢部販賣機有幾受歡迎，就睇到幾個鐘之前網民話已經賣哂！
森霖優格
販賣機地址一：台南市東區東寧路510巷37號（烘焙樂工坊旁）（顯示地圖）
販賣機地址二：台南市中西區國華街三段26號（炸雞洋行附近）（顯示地圖）
森霖優格Facebook專頁：Forest Yogurt 森霖優格
爆趣販賣機4：盞鬼小鮮肉同伴奶茶！
早前紅透半邊天嘅小鮮肉奶茶大家應該唔陌生！早前就因為大家迫爆本店而加開咗販賣機啦～佢哋介強勢加推小鮮金同麼麼噠奶茶！小鮮女就唔駛多解釋，咪就係擁有窈窕身材嘅年輕女生囉，咁麼麼噠呢？就係智利復活島摩艾象，咀嘟嘟，勁盞鬼！大家排完小鮮肉奶茶後都會排埋小鮮女加麼麼噠，誓要儲成一套！下次去台南見到，唔駛問㗎啦，乖乖排隊畀錢啦，問多一秒都可能買唔到呀！
張三鮮小鮮肉奶茶
販賣機地址：台南市衛民街69號（顯示地圖）
張三瘋冰火菠蘿油專賣店地址：台南市中西區正興街66號（顯示地圖）
營業時間：12:00pm－7:30pm
張三鮮小鮮肉奶茶Facebook專頁：小鮮肉奶茶（台南-張三瘋冰火菠蘿油專賣店）
延伸閱讀：
