誠品
誠品

誠品生活進駐太古城!直擊6大注目品牌獨家產品 | 太古好去處 |

熱話

廣告

繼尖沙咀之後,誠品生活亦正式進駐太古城,喺今日(1月6日)開幕喇!今次係誠品喺香港嘅第三間分店,佔地兩層,面積超過4.9萬呎,書區比台北敦南店大一倍半。

首設Homemade Studio舉辦活動

太古分店首次設立Handmade Studio,定期舉辦不同工作坊及分享會,烹飪、時裝、手作等類型都有,都幾吸引,而且喺書店入面舉行工作坊,成件事好「誠品」。

以家為題 設有全港最大兒童館

同尖沙咀分店唔同,今次除咗係文青百貨公司之外,仲特別設有親子閱讀互動兒童館,以「家」為意象,主攻一家大細嘅客源。

兒童館入面有全港最大嘅兒童閱讀空間,圖書、玩具、生活用品樣樣有齊,帶小朋友嚟就啱晒喇。

7大生活品牌推介

誠品生活太古店一共有47個生活品牌,食品、家品、廚具應有盡有,不過今次除咗引入台灣品牌之外,亦將本地品牌嘅數量增加至18個,推廣在地文創。今次記者就為大家精選咗7個生活品牌,帶大家睇吓佢哋嘅特色同埋誠品獨家產品。

1. LOVERAMICS(本地品牌)

第一次進駐誠品嘅LOVERAMICS以出售陶瓷產品為主,今次仲特別設有工作坊,可以即場買完陶瓷製品再親手上色,製作出獨一無二嘅作品,過吓藝術家癮。

 

不過要留意,加工之後要有心理準備陶瓷會縮小約13%。

2. 掌生穀粒(台灣品牌)

掌生穀粒雖然唔係第一次出現喺誠品生活,但係今次太古分店一樣有獨家產品。呢款名為「十八歲」嘅烏龍茶,飲落有淡淡嘅回甘,店員仲推介可以用嚟沖製港式奶茶添。

3. VOM FASS(德國品牌)

記者離遠見到呢間舖頭已經眼前一亮,呢度嘅酒、橄欖油、醋都可以試飲試食,仲可以將唔同口味混合,即場自製成「cocktail」。個人小推介VOM FASS嘅果醋,有別於市面上嘅果醋,入口唔會太酸,仲幾潤喉添。

4. Bodhi(泰國品牌)

Bodhi嘅產品以天然作為賣點,主打香薰同護髮用品,未行到埋去已經聞到好香,而且唔會嗆鼻,好舒服。

5. Black As Chocolate(台灣品牌)

來自台灣嘅蛋糕,除咗銅鑼灣之外,而家連誠品生活入面都有得賣喇~ 一共引入咗5款蛋糕,其中最經典嘅一定係呢款朱古力蛋糕,1月仲會有優惠,$378就可以買到一個6吋同一個2吋嘅朱古力蛋糕。(原價$416)

6. Cafe GREENPRINT(日本品牌)

呢間來自日本嘅Cafe係第一次嚟到香港開分店,餐廳以綠色為主題,由裝修到食材都採用低碳原料,甚至提供嘅食物都以白肉為主,提倡綠色生活。

7. sensory ZERO(本地品牌)

sensory ZERO由黃竹坑開到嚟太古誠品,最出名嘅就係手沖咖啡,可惜今日cafe未準備好,冇得試味。

誠品生活

地址:香港太古城道18號太古城中心 G/F 074舖(顯示地圖
營業時間:10am – 10pm
電話:34191188

延伸閱讀
新店直擊!誠品生活尖沙咀店正式試業!【尖沙咀好去處】
17間博物館1月免費入場!精選3大必睇館