放假參加美食、手作、工作坊! 復活節4大市集逐個睇
1. 紅Van小巴牌師傅即席揮毫！嘢冷骨董市《壹》
中環嘢冷市集主要推廣「舊物懷舊文化」，想重新介紹一啲舊式小店，讓大眾認識佢哋，並達到保育效果。只因小店愈來愈少，有心經營小店嘅人更少之有少，搞手希望透過呢個市集，最終可以保護一啲特有文化。當中最為市民熟悉嘅係「巧佳小巴用品」，就咁講可能唔太明，其實即係平日小巴用嘅字牌，全部都由巧佳呢間公司出產，充滿香港本土特色。
呢啲小巴牌係由李其忠師父，同麥錦手師父親手寫落嚟，完全代替程式化嘅電腦。平日我哋搭小巴，又點會考究呢啲小巴牌係咪人手寫？嘢冷市集就令我哋更深入認識呢個地方，知道更多特有文化。到時會限量發售巧佳小巴牌匙扣，非常的骰，買一個做留念都唔錯。
＊留意返：李師父同麥師父都會於3月26及27日，下午2點至4點到現場即席揮毫，非常有意思。到時仲會推出訂製小巴牌，可以根據客人需要訂製佢要嘅字。
話明呢到係嘢冷市集，又點止一間嘢冷店！到時會有6間小店，包括小時光、青春古著、巧佳小巴用品、Lastbutnotleast、Universe Vintage、Bing Bong Little Store，會賣Vintage皮具、外國藝術飾品、玻璃家具等產品，適合復古愛好者參加，話唔定係到執到寶。
中環嘢冷市集
地點：中環城皇街17號（顯示地圖）
日期：2016年3月26日至27日
時間：14:00-19:00
主辦單位網頁：嘢冷骨董店
2. 必join果醬工作坊！PMQ果藝市集
PMQ以生果作主題，有18間食檔參加，不論冷熱食品都有生果喺裡面。打響頭陣有本土出產牛奶士多啤梨，亦有手工雪條、特製花茶、芝士菠蘿熱狗等，喺出面比較難搵到嘅食品，今次一次過可以喺市集搵到，嚟返個生果套餐。食完嘢可以參加埋果醬工作坊，預先喺網上組隊報名，整返樽較健康及天然嘅果jam！
1. 靚造型牛奶水果雪條！
呢款雪條有種魔力，就係未食已經好吸睛，仲要用北海道牛奶mix天然果汁製成，咁牛奶味就唔會蓋過鮮果嘅味道，可謂真材實料。最重要係雪條無任何色素添加，女孩子唔怕食咗對身體有害。
2. 一見芝士即垂涎！炙熔芝士菠蘿熱狗！
菠蘿包就聽得多，今次竟然有真嘅菠蘿放喺芝士熱狗入面，確實係新嘗試。呢間店所製嘅芝士熱狗方法較特別，會將成塊芝士放喺熱狗上面，再用火鎗炙熔芝士，別有一翻風味。
3. 清新花茶最吸引！
呢間店用沖咖啡嘅原理沖花茶，透過氣壓打出花茶嘅味道，有別於平日就咁浸泡花茶，味道會更突出。如果想真正飲到花嘅味道，呢個亦係不錯嘅選擇，試下兩者不同之處。
4. 大大粒真．香港草莓！爽甜而且重奶味
講起士多啤梨，大家一定諗起日本種植嘅大大粒草莓。不過今次要介紹嘅係土生土長，香港牌牛奶士多啤梨。原來農夫會喺士多啤梨成果後，每星期用鮮奶灌溉啲士多啤梨兩次，所以口感會比較爽甜同重奶味，唔怪得個名多咗「牛奶」兩個字。
5. 果醬工作坊 平均$40樽
4日市集有唔同workshops，除咗整果jam，仲有果酒、Tote Bag、親子耕作坊，時間不一，記得預早報名。今次主要介紹2個果jam工作坊，第一個只製果醬，第二個就教埋點整水果清潔酵素，推行環保理念，最平平均$40就有樽天然果醬。記得預先組隊於網上報名，睇清楚工作坊舉行日期。
手工果醬工作坊
時間：3月25至26日(3pm-4:30pm/6:30pm-8pm)
簡介：自家製作無添加果醬
包材料：每組3樽50ml果醬
參加辦法：網上報名
價錢：每組$120（1-3人一組，每班最多6組）
手工果醬及水果清潔酵素工作坊
時間：3月27至28日(1:30pm-2:30pm/5pm-6pm)
簡介：自家製作無添加果醬，並用剩餘果皮作清潔酵素
包材料：每組共有50ml果醬及水果清潔酵素各2樽
參加辦法：網上報名
價錢：每組$140（1-2人一組，每班最多4組）
PMQ春日限定．果藝市集
地點：PMQ元創方地下Marketplace & Courtyard（顯示地圖）
日期：2016年3月25至28日（星期五至星期一）
時間：13:00-21:00
3. 沖天救兵氣球裝飾！荃灣聰明豆市集
以前播《沖天救兵》，已經成日幻想自己係戲裡嘅老伯伯，坐住會飛嘅屋，由好多好多個氣球帶我沖上雲霄，欣賞周圍嘅環境。依加竟然荃灣都有一千個氣球裝飾比大家影相，現實與卡通片融為一體，呢到肯定唔止係小朋友嘅天堂，亦係大人重拾童真嘅時候。市集有超過160間本地商店參展，主要賣自家設計及手作，以皮革、手工肥皂，花藝及自家設計時裝為主，影完相又可以買下手作仔。
市集會喺露天廣場舉行，仲會搞工作坊，譬如畫Henna、復活蛋同自製襟章，都係好適合一家大細一齊玩嘅活動。
Smart．mart聰明豆市集
地點：荃灣D‧PARK愉景新城露天廣場（港鐵荃灣站A3出口）（顯示地圖）
日期：2016年3月25至27日（星期五至日）
時間：13:00-21:00
4. 美食嘉年華！糖廠街市集
今次糖廠街市集有超過30間食店任你試！當中，有人氣龍蝦包、fusion味糖廠街熱狗、啖啖肉好Juicy的烤豬手配德國酸菜，亦有為素食人士而設的香口粒粒雞，保證食到抱住肚皮返屋企！
1. 啖啖鮮味龍蝦肉漢堡@MAMA Burger & Lobster
老闆難忘英國食過的龍蝦包，於是決心開店，主打龍蝦和漢堡。餐廳選用的活龍蝦，每隻最少1.5磅，天天新鮮由加拿大到港。為保持原味，龍蝦先蒸後輕燒，拆肉後以自製蛋黃醬、橙汁、檸檬汁調味提鮮。
2.冷麵熱狗?! Fusion味熱狗店@Noodle and Dogs
菠蘿包都可以加菠蘿，點解麵包唔可以加麵？店主就以這個概念，製作出冷麵熱狗！店主將有記麵店的冷麵配上芝麻醬、火箭菜和熱狗腸，本身都已經好吸引。但店主們都覺得好似差咁啲脆口的食物，希望令整個熱狗更加有口感，於是加入南丫島出品的炸白飯魚，香脆之餘，又令整個熱狗的味道有更多味蕾上的衝擊。
3. 濃郁夏威夷魚生飯店@Pololi
這家夏威夷魚生飯店 Pololi，店內色彩繽紛，牆上掛著木製滑浪板，充滿夏威夷風味。魚生方面，有6-8款，以吞拿魚刺身為主，醃料有泰式冬陰公醬、牛油果醬和Wasabi等，非常入味而且濃郁。主菜方面，有3款選擇，白米飯、糙米和沙律菜，配上魚生後，亦可選擇加入芝麻醬來調味。
4. Juicy德國豬手店@Golden Pig
Rachel（@dubdew）張貼的相片 於 張貼
5. 抹茶味雪糕@Via Tokyo
6. 雞肉窩夫三文治@Bread and Beast
糖廠街市集
舉行日期：20/3-12/6/2016，逢週日
地址：太古坊糖廠街（顯示地圖）
營業時間：11:00-17:00
延伸閱讀：
Miffy登陸銅鑼灣! 8款得意精品+2大影相位逐個睇|銅鑼灣好去處|
韓國Tom N Toms咖啡店到港! 3大韓式吐司出擊 |沙田有咩好食|
新假期周刊 電子書：
ios：https://itunes.apple.com/hk/app/xin-jia-qi-zhou-kan/id722179449?mt=8
Android：https://play.google.com/store/apps/details?id=com.weekendhk.newsstand2&hl=zh_HK
新假期食玩報料：[email protected]
歡迎Instagram / facebook 使用#weekendhk 報料，資料一經選中會為你公告天下！
想最快接收第一手的旅遊飲食資訊？Easy！
1. 先分別讚好「新假期周刊」及「新假期Jetso 」兩個Facebook專頁
2. 在「讚好」按鈕下揀選「搶先看」，搞掂！
