荔園Super Summer 2016
荔園Super Summer 2016

荔園Super Summer 2016 新增高卡車!即睇7大必讀Q&A

生活

廣告

一年容易又荔園,今年暑假又有新搞作, 荔園Super Summer 2016 以「夏日大晒」作主題,改喺亞洲博覽館舉行,引入彈床、高卡車、充氣競技遊戲等新玩意,等大家重拾童年回憶的同時,又有新嘢玩!

 

Q1:荔園Super Summer 2016 幾時搞?

主辦單位今日正式宣布, 荔園Super Summer 2016 將於7月15至8月7舉行,星期一至日無間斷,食正暑假檔期,不過就只得24日,好似有d短。

Q2: 今年喺邊搞?

去年於中環海濱舉辦的荔園Super Summer,不過去年時常落雨、場地積水,未知是否有影響生意,所以今年移師到亞洲國際博覽館舉行,唔知大家會唔會嫌遠呢?

不過今次比較特別,分為室內同室外區域,場內佔地11,000平方米,戶外就有8,000平方米,加埋就同上年面積差唔多,所以預計規模都同去年類似。

Q3:今年駛唔駛入場費?點收費?

去年荔園其中一個賣點就係免費入場,可惜今年無咗呢個賣點,因為場地轉咗去亞博之後,就需要買入場套票,6月1日開始可以網上預約門票。

星期一至四,成人每位收費$140,包括10個代幣(代幣單買$10/個);星期五至日就分時段收費,12pm前入場都係$140,12pm後入場就$180,包括12個代幣;3歲以下免費入場,65或以上長者則半價入場。換句話講,即係要收$40-$60入場費不等。

Q4: 遊戲設施點分佈?

大會今日公佈咗場地地圖,大象、恐龍等等荔園icon繼續出現,另外亦有妖怪手錶、高卡車等等。

Q5: 高卡車點玩法?駛唔駛另外收費?

荔園Super Summer 2016 將會有全港首個電動高卡車場,車場位於室外,佔地約8,000平方米,賽道全長650米,時速最快為每小時50公里。圈速最快嘅參加者,仲可以獲得首屆電動方程式錦標賽香港站門票兩張,好吸引!

不過高卡車要另外收費,每位$280/45分鐘,似乎有少少貴,6月1日開始可以網上預約門票。

Q6: 仲有咩新玩意?

除咗高卡車,今年荔園都有其他新玩意,例如妖怪手錶專區,入面包括攤位遊戲、pop-up store、互動專區,帶小朋友去就啱晒喇!

另外仲有全港最長充氣競技遊戲,全長110米。以往類似嘅充氣設施都好受歡迎,估計到時都會大排長龍呀。

而恐龍Dino亦會化身充氣彈床,到時大家可以入去佢個肚dum入面跳跳跳。

Q7: 亞博咁遠,有無乘車優惠?

機場快線會提供即日來回車費優惠,來回青衣站$42;香港站、九龍站$57;機場站$5,不過大家記得要使用八達通,於客戶服務處換購車票。

荔園Super Summer 2016

地址:亞洲博覽館(顯示地圖)
日期:2016年7月15日至8月7日
時間:星期一至四:11am-8pm;星期五至日:10am-8pm
收費:星期一至四:成人$140 長者$70(包10個代幣);星期五至日:12pm前入場成人$140 長者$70(包10個代幣);12pm後成人$180 長者$90(包12個代幣);3歲以下小兒免費入場

***單購代幣 $10