【玩過未？】閨蜜入跑馬地馬場開Bubble Party ＠MISS SUNNY

Dec 23 2016

(Presented by HKJC)

年年聖誕都去差不多類型嘅派對，噚晚我Miss Sunny就約咗閨蜜去跑馬地馬場 The Gallery餐廳搞搞新意思，開聖誕Bubble Party！班姊妹成日以為馬場只啱男士去，其實呢度經常搞Ladies Event，好多節目都係為女仔而設，已經變成咗女生都啱玩嘅潮點喇！

噚晚我地7點就入場，一邊食buffet，一邊玩遊戲、歎bubbles，仲有特別嘉賓JW王灝兒現身同大家一齊玩，仲學埋馬場潮語，笑聲不絕，超興奮呀！而且入馬場過聖誕，氣氛超好，感覺好特別呀！

應節聖誕Buffet

The Gallery的半自助餐一直在城中甚具水準，今次的聖誕buffet都無令人失望。過節點少得火雞，主菜先來每人一份燒火雞伴栗子餡及迷你椰菜，另外buffet bar有唔少聖誕主題應節美食，款款好睇又好食。由於呢個係女士專屬嘅派對，10幾款甜品唔少都係節日主題，賣相別緻，真係忍唔住要相機食先。話明Christmas Bubble Party，大家都可以邊食邊歎bubbles，同班姊妹摸住酒杯底飲下氣酒傾下偈，感覺好chill！

瘋狂玩Treasure Hunt

遊戲一開始，每張枱都放咗張問題卡，成班女仔都瘋狂地玩Treasure Hunt，話咁快就有3位朋友答啱賽馬問題，可以同JW一齊Bubble Tasting，大家試咗3款香檳同氣酒，一般女仔比較鍾意sweet啲嘅bubbles，估唔到JW鍾意味道濃啲嘅口味！

開派對學到嘢

難得入馬場，梗係要學下賽馬知識先可以玩得投入盡慶。識逢當晚有夜馬賽事，同場安排咗一個女生專屬嘅入門賽馬課程「Racing 101」，由JW做客席嘉賓主持，教姊妹們簡單認識下賽馬，點樣觀察馬仔睇佢眉頭眼額同心情，仲學埋馬場潮語，例如「換腳」代表馬仔跑到攰嘅時候，由其中一隻前腳換另一隻前腳帶動，令雙腳壓力平均分佈；而「鬥燒」即係比賽時兩匹馬互鬥兼消耗體力，末段竟然被後來嘅馬冷手執個熱煎堆，內容係咪易學又得意呢，同班閨蜜參加呢啲活動幾有新意！