穿不下就買大一個碼@賣字

生活

廣告

成日都有人問我對將來有甚麼計劃,有甚麼是好想做,我經常都會想扮演一個有遠見的文偽青年,答吓嗰啲在挪威閲讀村上春樹呀,買一朵玫瑰到撒哈拉沙漠呀,到小吳哥窟找個小洞埋葬秘密,嗰啲呢。但呢,就真係作狀到連我自己都唔好意思講出口。事實是,連明天都太遠,我不知道要怎樣想象將來。

但係耶穌話一年之計在於春,年頭,點都好似應該計劃下人生。我前年年頭說我得每天學懂一樣東西,就算是一樣無聊的東西也可以,三百六十五日,我也總算有了三百多個無聊的念頭。去年我跟自己說每個月都得讀一本書,有時偷雞,就看那些薄到唔薄的精裝散文集,好歹都叫本書,打個折,最少都叫勉勉強強有努力過。

人呢,不是不知道自己永遠不能跟上目標,而是定立目標的目的,就是為了有個目標可以降低。你說要每天運動,結果一星期一次,最少你有七分一達標。你說要戒煙,每星期只做friday smoker,也只有七分一時間放縱。這事如同減肥,親愛的,諗過,試下,堅持過少少,然後再低空略過,無再肥啲,成就嚟架啦,人生已經如此的艱難,有些事情就不要拆穿。一年之計喎,年尾嗰陣都仲記得,咪叫叻囉。目標,係要嚟放棄架嘛。

又真係好似減肥咁,到你要結婚,要影結婚相,你居然就會減到最成功的一次肥。到要做的時候,你自自然然就會做到,欠了的,是適婚的年齡。今年我的目標是肥多幾磅,肥了,才有肥可減嘛。新年,祝大家今年沒有穿不下的褲子。

(註:《適婚的年齡》是樂隊MY LITTLE AIRPORT 2014年的專輯)