摩星嶺
摩星嶺

$190懶人露營計劃!終極大海景 摩星嶺 周末遊

生活

廣告

唔知大家會唔會有以下情況,每次計劃露營嘅成事率低於10%,而每次受到阻礙嘅原因並唔係個friend甩底,而係三個字:太.麻.煩!有誰共鳴?日日返工已經夠哂攰,諗起放假仲要租營帳、帶被鋪、買嘢食、安排煮食工具,吖!仲有帶多兩套衫驚出汗無涼沖……真係諗起都頭痕!

本來記者以為呢世都去唔成,但竟然畀記者發現香港青年旅舍( 摩星嶺)最近推出咗個「兩手FING-FING去露營」計劃,每人百幾蚊就幫大家準備好哂露營嘅所有嘢!嘩,咁講法,今日book 聽日就可以出發啦喎!

一條龍露營服務?

講到明係「兩手FING-FING去露營」,以上提到所有嘅露營煩惱大家都唔駛擔心~事關計劃會包哂專人鋪床、搭營服務,等唔識搭營嘅新手都可以一嘗露營滋味。另外,仲可以用旅舍嘅淋浴設備,畀大家沖埋涼,唔駛留住汗臭過夜同有免費穿梭巴士接送,可以輕輕鬆鬆去露營。

而對於為食友嚟講,食先係最緊要!計劃亦提供旅舍廚房,大家入嚟想食乜就煮乜,唔駛吓吓淨係煲公仔麵咁㝰喇!大家如果連嘢食都唔想帶埋入去的話,不妨考慮加錢訂旅舍提供嘅海鮮燒烤包(有蒜蓉牛油芥末紐西蘭青口、美國安格斯牛扒、法式蒜蓉包等)~第二日早餐亦唔需要操心,計劃包咗早餐食材,等大家可以試吓野外煮早餐,正!

計劃包括專人鋪床、搭營服務。圖片來源:香港青年旅舍官方網頁

 

270度觀景台,睇勻哂維港、青馬大橋和離島區海景。

營地有乜睇?

今次計劃 地點係位於香港島嘅賽馬會摩星嶺青年旅舍營地,位置面向東博寮海峽和硫磺海峽,仲有個特設270度觀景台,畀大家一次過睇勻哂維港、青馬大橋和離島區海景!另外,沿旅舍旁嘅登山小徑行上去,更可以睇埋摩星嶺炮台軍事遺跡群,欣賞二次大戰時嘅歷史建築,露營都上到歷史堂喎!

摩星嶺旅舍:兩手fing-fing去露營

地址:賽馬會摩星嶺青年旅舍(顯示地圖
價錢:港幣380元(兩位),其後每位另加港幣140元 (最多4位)
參加人數:2-4人(每營)(計劃需二人以上參與)
預訂方法:致電2817 5715 或電郵至 [email protected]
查詢熱線: 2817 5715
計劃詳情:https://www.yha.org.hk/