屯門 t park
屯門 t park

勁歎無敵大海景! 屯門 T PARK 免費SPA下月公開試玩!

生活

廣告

講到香港嘅排污及處理問題,相信各位環保之士都有話兒,講到下年都未必講得完!「轉廢為能」為香港處理污泥嘅方向,近日於屯門曾咀就有個100%自給自足嘅環保園區( 屯門 T PARK )開幕,當中設有嘅水療池區係以焚化污泥嘅過程嚟恆溫,做到排污同時為市民提供放鬆身心之地!歎住恆溫水療池、戶外足浴池兼望住無敵后海灣大海景同時,園區亦進行污泥處理程序,而設施最快於六月二十九日正式開放畀公眾,睇嚟宜家要ready 預約試浸!

T PARK 免費三大恆溫水療池區

T・PARK 分為五大園區,而最關注嘅當然係 T・SPA(源.泉)水療池區!室內水療池區分為三個唔同水溫,熱水池為(攝氏 40 度)、室溫池(攝氐25 度)同埋冷水池(攝氐15度),提供三種溫度,大家咩天時都浸得,而以上水療池亦靠污泥焚化過程產生嘅電力來加熱同冷卻水溫,大家一邊浸浴,一邊感受「轉廢為能」!

T・SPA 可供男女共同使用,一家大細去玩一流!此區以預約制安排公眾浸浴,全日設四個開放時段,時間約1.5-2小時,而每個時段可容納50人,唔怕大家迫住浸!

而家園區暫時仲未開放畀公眾,唔知設計有無可能似鄰近嘅台灣水療區咁靚呢?

水療池區外值得留意之四大園區!

T・PARK 除咗水療池區外亦分為其他園區可供公眾參觀,之但係其餘8個園區中邊個係重點園區呢?記者為大家挑選咗四個重點園區:

源・林-生態公園歎足浴

T・PARK 為環保園區,當中有個超過9800平方米嘅戶外園林花園,有齊濕地公園、噴泉花園、悠閒花園、禪園,而最最最重要係呢個園區設有戶外足浴暖水池,喺公園道浸腳,似足日本溫泉公園設計!

源・湖-罕見雀鳥保護區

以往想喺林地觀鳥嘅首選必為米埔濕地公園,而家呢個重建嘅雀鳥保護區為各位愛鳥之士提供多個選擇,大家可以喺度睇到小鸊鷉、翠鳥、苦惡鳥、蜻蜓同其他兩棲類動物。

圖片來源:官方圖片。

源 · 臺-俯瞰180度后海灣海景

下白泥眾所周之係觀賞無限夕陽海景之地,而T・PARK鄰近下白泥,大家不彷嘗試喺呢度天台以唔同嘅角度一覽后海灣之景,或有別一番感覺!

圖片來源:官方圖片。

源 · 館-污泥處理教育中心

園區除休閒設施外,亦係污泥處理廠,全港共11間污水處理廠都將會將污泥運去呢度處理;而呢度亦設有海水化淡廠,從后海灣抽取海水後再經處理為可用水。而呢個園區為環境教育中心,內裡展覽區同互動展品介紹處理污泥程序、運作等,一場來到不彷好了解同認識污泥廠究竟點運作,而記者亦建議有興趣了解嘅朋友報名參加呢度嘅導賞團,特設專人講解,一場嚟到可以確確切切上一課!

圖片來源:官方圖片。

雖然 T・PARK 可以話係近年令人眼前一亮嘅新建設施,但有鄰近嘅居民就話運送污泥車經過會發出惡臭,根本令人無興致入去遊玩!究竟真實環境係未咁呢?而記者精選嘅園內設施真身又係點呢?大家一於等記者嘅試浸報告,為大家直擊真相!

T・PARK

地址:屯門曾咀稔灣路(顯示地圖
開放時間:星期一、三至日,10:00am-7:00pm
公眾開放日期:2016年6月29日
預約電話:2910 9700
官方網頁:http://tpark.hk/

前往方法:

1)免費穿梭巴士服務,需預約及留意時刻表(顯示網頁
2)自行駕車,須預訂停車場泊車位

備註:

1)T・SPA 設4個時段,由10:00am開始,並於6:30pm結束,市民須於使用前3天前或30天內預約。
2)導賞團 設5個時段,由10:30am開始,並於5:30pm結束,設有廣東話、英語及普通話選擇。