森美帶團 日本
森美帶團 日本

森美帶團遊日本四國 平杜如風10萬!全程陪足4日 用腹肌帶你浸溫泉

日本

廣告

早前森美拍旅遊節目《森美旅行團》大受歡迎,想真係跟森美帶團去旅行?機會嚟啦飛雲!東瀛遊邀請森美成為星級導遊,帶團去日本四國,只限1團,咁啱同杜如風同期出發,一齊睇睇有咩分別啦!

text:Cynthia|photo:Woody、相關機構

01|團費:森美$15,000 VS 杜如風$120,000

大家報團首先梗係睇價錢,森美今次直航飛德島玩4日(2月1-4日),團費包來回機票、3晚酒泉酒店及每日3餐,仲包晒景點門票,每位$15,888,以一般名人帶團來比較,真係唔算貴!再睇睇杜如風東京6日團,踩正紅日大年初一(2月16-21日)當然係會貴啲,但要成$118,888,貴成10萬蚊以上,絕對可以稱得上「天價」、「離地價」,相信唔係一般打工仔畀得起!

02|地點:四國「森」度遊 VS「瘋」買東京

對於好多香港人來說,日本四國德島不算是熱門的地方,平時無直航機去,而今次森美帶團更會坐港龍獨家的包機直航!比起個個都識去、自己一個去都無問題的東京,德島更有跟團的價值,森美大sell可以去秘景,走文化深度遊路線,仲話會講解好多歷史資料!但如果鍾情食買玩嘅,跟杜小姐就啱啲。

03|行程:秘景文化遊VS瘋狂Shopping

對於行程去邊,森美就表示自己係一個文青,所以就會帶大家去睇秘景、了解文化嘢,包括親手做烏冬、體驗嗚門大橋漩渦趣等,同埋會帶領大家跳傳統阿波舞!森美認為其實日本唔係一個只有Shopping同打卡的地方,可以感受一下大自然,仲話:「無咁上下修養就唔好跟我團啦!」而杜如風嘅行程,可以用「浮誇」兩個字來形容:坐直升機睇東京日落、遊艇食法國菜、3星米芝蓮懷石料理,再加無限個瘋狂Shopping時段,睇你興趣選擇跟邊個啦!

04|導遊服務:杜如風客串 VS 森美跟足全程

跟得明星去旅行,重點一定係明星本人的出席率:杜如風嘅行程單張寫得好清楚,如果杜如風「因個人身體狀況或其他不能遇見因素導致未能出席,客人不能藉此退出。」而且「杜如風每日隨團之時間,以當日安排為準。」勁有保留!反而森美接受訪問時表示,佢會完完整整跟足4日,仲保證每次搭車都一定會唱一首歌,浸溫泉嘅時候仲會大方show腹肌「睇肉系」!咁有誠意,唔知大家會點打賞呢位導遊呢?

森美:我恨做導遊好耐!

被問到點解會答應帶團,森美表示自己由細到大嘅夢想,就係想成為導遊,可以同團友互動,介紹景點、帶歡樂畀大家,所以今次一有機會,就立即答應!

 

《星級導遊森美遊德島4天之旅》
報名日期:12月9日起
出發日期:2018年2月1-4日
價錢:$15,888(經濟艙)/$16,888(商務艙)
行程:行程包括去道後溫泉會館嘆溫泉、欣賞傳統阿波舞、踏上鳴門大橋奇趣漩渦走廊、製作讚崎烏冬等。
名額:30人
網址:www.egltours.com/travel/

延伸閱讀:【森美旅行團】東京平食推介 4間抵食餐廳清單|東京食買玩全攻略(三)